Emakumeen kontrako indarkeriaren aurkako ekitaldiak aurkeztu dituzte
Azaroaren 14tik 23ra bitartean ekitaldiak egingo dituzte, udaleko Feminismo Sailak antolatuta. Sentsibilizazioa eta kontzientzia piztu nahi dute.
Lasa, Lizaso, Leibar, Arbelaitz, Saez de Egilaz eta Cousillas. Azaroaren 25ean Emakumeen Kontrako Indarkeriaren Aurkako Nazioarteko Eguna da. Horren harira, Oiartzungo Udaleko Feminismo Sailak hainbat ekitaldi antolatu ditu, eta indarkeria mota ezberdinak azaleratu eta sentsibilizazio eta kontzientzia pizteko.
Gobernu taldeko emakumeek aurkeztu dituzte ekitaldiak: Olga Leibar Feminismo zinegotziak; Eneritz Arbelaitzek; Iosune Cousillasek; Olaia Lasak; Arrosa Lizasok eta Haizea Saez de Egilazek.
Esan dutenez, indarkeria matxista betidanik existitu da, nahiz eta mugimendu feministak azken urteetan azaleratu duen.
“Leku eta garai historiko desberdinetan eraiki da emakumeen kontrako indarkeria”, esan dute emakume zinegotziek. “Guztietan, baina, indarkeri matxista horri aurre egiteko estrategiak sortu dituzte emakumeek. Eremu desberdinetan indarkeriari aurre egiten dioten planteamendu eta jarrera feministak erakutsi nahi ditu Udalak azarorako antolatu den egitarauarekin”.
Horregatik, emakumeen kontrako indarkeriarik gabeko gizartea eraldaketa eta kontzientziazioarekin bakarrik irits daitekeela nabarmendu dute.
Egitaraua
- Azaroak 14, osteguna: Kontrako eztarritik bertso saio literarioa: Uxue Alberdi, Miren Artetxe eta Alaia Martin. Gai-jartzailea: Danele Sarriugarte (udaletxeko areto nagusian, 19:00etan).
- Azaroak 20, asteazkena: Kurdistango YPJ defentsei buruzko Comandante Arian dokumentala (zuzendaria: Alba Sotorra) eta El salto. Ondoren, eztabaida Euskal Herriko Bilgune Feministako eta Rojavako Brigada Feministako Maddi Gallastegirekin (udaletxeko areto nagusian, 19:00etan).
- Azaroak 22, ostirala: Erradikalak ginen, gara eta izango gara. Ane Labaka bertsolaria eta Beatriz Egiazabal umorista artista (udaletxeko areto nagusian, 19:00etan).
- Azaroak 23, larunbata: Autodefentsa tailerra, Maitena Monroyrekin (udaletxeko areto nagusian, 09:00-18:00).
Autodefentsa tailerra egun osoko ikastaroa izango da, elebitan, eta aldez aurretik eman beharko da izena, tokiak mugatuak direlako. Hamalau urtetik gorako edozein emakumek har dezake parte.
Izena emateko, udaletxeko harreratik pasa daiteke, edo Internet bidez egin.
