Larunbat arratsaldean K1 eta MMA borrokaldiak izan ziren ikusgai Agustina Otaola pilotalekuan, Errenteriako 'Kenthai Fight Club'-ek antolatuta.
Maila handiko borrokaldiak izann zirenn larunbatekoak. 
Borrokaldiak ez dira oso ohikoak Oarsoaldeko kirol eskaintzan. Baina larunbatean argi geratu zen zaleak badirela, eta borrokaldiak ikusteko gogoak badituztela. Erantzun bikaina eman zioten larunbatean herritarrek, Kenthai Fight Club-ek antolatutako jaialdiari, Agustina Otaola pilotalekua bete baitzuten.
Luzaz boxeoa izan da Euskal Herrian zaletasun gehien piztu zuen borroka-kirola. Aditu guztiek ezagutzen dute Jose Manuel Ibar Urtain boxeolari historikoa. Kerman Lejarragak, Andoni Gagok eta Jon Fernandezek bestalde, euskal boxea sasoi betean dagoela frogatzen ari dira gaur egun. Borroka-kirolen eskaintza ordea, geroz eta zabalagoa da eta azkenaldian arte martzialek geroz eta pisu handiagoa dute.
MMA eta K1 modalitateko 9 borrokaldi izan ziren ikusgai aurrekoan Agustina Otaolan. Biak ala biak nahiko modalitate berriak dira. Ukabilkadez gain, ostikoak saltoak eta bestelako kolpeak ere onartzen dituzte, bereziki MMA, Arte Martzial Nahastuek.
Oraindik ere gutxi batzuk egiten duten kirola bada ere, argi dago zaleek interes handia dutela, larunbatean goraino bete baitzuten pilotalekua. Intentsitate handiko borrokak izan ziren, baina ez bortitzak. Kementsu aritu ziren borrokalari guztiak, eta elkarri astindu arren, adiskidetasuna nagusi izan zen uneoro.
Errenteria-Oreretako Kenthai Fight Club-ek antolatu zuen ekitaldia, eta beste hainbat tokitako borrokalariak etorri ziren, hala nola, Donostia ala Portugaletetik. Profesionaltasunez antolatutako jaialdia izan zen; arbitroa, medikuak, entrenatzaileak eta speaker-a, ez zen ezer falta. Borrokalariak itxuroso aritu ziren eta publikoak guztien grina eskertu zuen.
Hona hemen HITZAk bildutako hainbat irudi.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
