[Galeria] Bidea argi dutela erakutsi dute
Ekintza sinboliko bezain deigarria egin zuten bart ehunka herritarrek Pasaiako badiaren bokalean. Bi bazterrak argitu zituzten, demokraziaren alde eta Kataluniar herriari babesa emateko.
Argi elektrikoez gain, zuziak erabili zituzten bokalea argitzeko. Ordu gutxi batzuk izan bazituzten ere dena antolatzeko, erantzun bikaina izan zuen atzoko elkartasun ekintzak. Ehunka argi izpik bokaleko bi bazterrak argitu zituzten, Kataluniako herriari, beste behin, babesa adierazteko eta erabakitzeko eskubidearen defentsa egiteko.
17:00ak inguru hasi ziren herritarrak adostatutako tokietan biltzen. San Pedron Torrean elkartu ziren ontziralekuaren alboan. Donibanen aldiz, pixka bat aurrerago egin zuten hitzordua, Errekako arkuaren azpian. Bertan zain zituzten Gure Eskuko ekintzaileak azalpenak emateko. Dena ongi atera zedin, jendea ongi kokatu behar zen eta puntu jakin bat argitu.
Linternak, frontalak edota mugikorrak, denetarik eraman zuen jendeak; Gure Eskukoek gainera, zenbait zuzi banatu zituzten argien kontrastea areagotzeko. Argiez gain, ikurrinak eta esteladak ez zituzten etxean ahaztu parte hartzaileek. 18:00tan hasi ziren argiak pizten eta 20 minutu beranduago, ilunetan, zuziak piztu zituzten.
Donibanen Alabortza inguruan hasten zen argien katea eta kasik Bonantzaraino egiten zuen ibilbidea. San Pedron ordea, puntetan hasi, eta Platako Farolara igotzen den eskailera argiztatu zuten. Goiko partetik pankarta erraldoia atera zuten Erreferenduma demokrazia da esaldiarekin. Era berean azpiko itsas-morruan demokrazia hitza osatu zuten zenbait lagunek kartelak eskutan zituztela.
Aldarrikapen politikoa eta jai giroa uztartu zituen berriz ere Gure Eskuk. Erreferenduma inoiz ezin duela delitua izan, argi adierazi dute. Altsasuko gazteak ere gogoan izan zituzten herritar askok, Kataluniako buruzagi presoak bezala, haiek ere Espainiar Auzitegien neurrigabekeria pairatzen ari dira eta.
HITZA atzoko ekintzaren hainbat irudi bildu ditu.
