Patriarkatuaren kolpe bakoitzari, erantzun tinkoa
Nazkatuta eta amorruak gainezka egin dute protesta,"istorioa errepikatu delako". Azken egunetan hiru emakumek eraso matxistak jasan dituzte Errenteria-Oreretan, eta hirurak bikote ohiek eraso dituzte.
Hamarka lagun elkarretaratu ziren pasa den ostegunean , herrian egun gutxiren buruan izandako hiru eraso sexista salatzeko. Hamarnaka lagun bildu dira Oreretako Mugimendu Feministak gaur arratsaldean deitu duen elkarretaratzera. Nazkatuta eta amorruak gainezka egin dute protesta,”istorioa errepikatu delako”. Azken egunetan hiru emakumek eraso matxistak jasan dituzte Errenteria-Oreretan, eta hirurak bikote ohiek eraso dituzte. Nekatuta, patriarkatuak berriz ere kolpatu dituelako, orain eta hemen, herrian bertan baina beren askapenean subjektu politikoak diren konbentzimenduarekin, “gure buruarekin pentsatzen ikasi dugu emakumeok gure aurkako opresioa ezagutzen goazen neurrian; egunean egunean identifikatzen ikasten ari garen opresioa. Bide hau pertsonaletik ari gara egiten, gaur salatzen ari garen bortxaketa eta gainontzeko eraso matxistak bezalako bidesariak ordainduta. Baina bide hori modu kolektiboan ere ari gara egiten, antolatuta, gure indarrak batuta eta kalera aterata”.
Erasoen aurrean tinko azaldu da mugimendu feminista eta autodefentsarako hautua berretsi du. Hori gakoa indarkeria matxistari aurre egiteko, autodefentsa feminista. Biktimak ez direla diote, ezta subjektu pasiboak ere eta berriz ere kexu azaldu dira instituzioetatik bultzatzen diren neurri asistentzialekin, “ez direlako nahikoak”. Kontziente dira, gainera, bide luzea dutela aurretik emakumeek sufritzen duten sexu indarkeria errotik ezabatzeko eta polizia eta epaile neurri zigortzaileez gain, bestelako jarrera, ekintza eta neurri beharko dituztela. Prebentzioa eta batez ere, ezarritako ordenua iraultzea ezinbestekoa dela diote arazoaren muina identifikatu eta aurrera egiteko. Aldaketarako neurriak galdegin dituzte, “gure bizitzen nukleoari eragingo dioten neurriak, eta duinduko dituztenak bere ziklo osoan. Politika integralak, zintzoak eta ausartak, eta ez interes politikoen alde egindakoak”.
Kalea ere emakumeena dela aldarrikatu dute eta auzo eta herrietan libre ibiltzeko eskubidea dutela, “egunez eta gauez ere, espazio guztiak hartu nahi ditugu emakumeok eraldaketa bidean, plazak, kaleak, udalak, komunak, antzokiak, tabernak, espazio eta bide guztietan libre izan, parrandan lasai ibili”.
Ez dira kikilduko, ezta isilik geratuko ere erasoen aurrean, hala berretsi dute gaurko elkarretaratzean, “erasotzaileak izen abizenekin ezagutu, gure kaleetatik baztertu eta kanporatu arte ez dugu etsiko. Gure burua eta gure lagunena babesten jarraituko dugu, erasotzaileak baztertzen segituko, emakumeen sareak antolatzen, eta patriarkatuaren aurka konspiratzen”.
