Ziriza herritarrena izatea nahi dute Trintxerpeko elkarteek
Barrutiko 21 elkartek herriarekiko arduratsu jokatzea eskatu diote Portu Agintzari, Ziriza Etxea hiritarrei itzuliz.
21 elkartek egin dute bat 'Ziriza Etxea Herriarena' manifestuarekin. Trintxerpeko elkarteak “nazkatuta” daude. Esaldi horrekin hasi zuten atzo arratsaldean egindako prentsaurrekoa, Trintxerpeko alkateordetzan. Ziriza Etxea herriarena da! manifestua aurkeztu zuten Trintxerpeko 21 elkartek. Barrutiak duen aisialdirako espazio falta salatu zuten alor ezberdineko elkarteek; Emakumeen Danborradak, Trintxer Kirol Elkarteak, Karmengo Ama Ikas Komunitateak edota Trintxerpeko Korkoiburuek, besteak beste.
Urriaz geroztik, Pasaiako Udalak Ziriza Etxearen kudeaketa Pasaiako Portu Agintaritzaren esku utzi duela oroitarazi zuten elkarteek. Ordutik, eragileek zailtasunak dituzte haien ekintzak bertan aurrera eramateko, eta hemendik aurrera zailtasunak areagotuko direla aurreikusi dute.
Erakundeak herrigintzan ari direnen jarduna oztopatzen ari direla salatu zuten elkarteek, “nazkatuta gaude azpijoko politikoen ondorioak jasateaz, gure helburua herriarentzat eta herriarengatik, gauzak egitea izanik”.
Ziriza Etxeak hobekuntza asko behar ditu, baina arazoak arazo, Trintxerpek behar-beharrezko duen eremua da, “beste edozein espaziok baino baliabide gehiago eskaintzen dizkigu, eta gure jardunean ezinbesteko bihurtu da”.
Ziriza Etxearen auzia, Pasaiako Portu Agintaritzaren eta udalaren arteko desadostasunen ondorio izan dela uste dute. Bien arteko liskarrak, ordea, elkarteen jardunari eragin dio. Gauzak horrela, bi eskari helaraziko dizkiote Portu Agintaritzari; auzia bertan behera uztea, herritarrek ez ditzaten ondorioak pairatu, eta Ziriza Etxea herritarrei itzultzea.
Atzokoa auziaren berri emateko hitzordua izan zen. Hemendik aurrera antolatzen hasiko dira, Ziriza Etxea herritarrena izan dadin.
