Gau Beltza solidarioa ere bada
Senegalgo herrixka batek lezoarrek bildutako ibuprofeno pilulak jasoko ditu beste urte batez. Taloka kafetegian egin dute aurten ere bilketa, Gau Beltza probestuz.
Urte hasieran bidalitako laguntza eskertzeko, Senegalgo Keur Sette Awa herrixkako haurrek argazkia bidali diote Mitxeori . Lezo herri solidarioa dela erakutsi dute bizilagunek beste urte batez. Izan ere, jendetzak erantzun dio bigarren urtez Taloka kafetegiak egindako deialdiari. Gau Beltza probestuz, Afrikara laguntza bideratzeko ekintza berezia egin dute aurtengoan ere, arrakasta handikoa gainera.
Taloka kafetegiko jabe Edurne Mitxeo irundarra izan da egitasmoaren sustatzaileetako bat. Alde batetik, Gau Beltza egiteko ohitura berreskuratu nahi izan duela kontatu du irundarrak, Halloween festari «bira» emateko asmoarekin. Bestalde, eta nagusiki, Senegalgo herritarrei laguntza bideratzeko helburua zuen joan den ostegunean egindako ekintzak: «Festa berreskuratzeaz gain, haurrei erakutsi nahi diegu keinu txiki batekin pertsona askoren errealitatea alda daitekeela».
Keinu horiek egikaritzeko, ibuprofeno sendagaiaren pilula bilketa erraldoia egin zuten kafetegian. Bigarrenez jada, arratsalde festa ederra antolatu zuten, herriko haur eta urtean zehar bezero diren gurasoentzako espresuki. «Egun oso polita izan zen. Txokolatada, askaria eta marrazki zein mozorro lehiaketaz gozatu zuten haurrek, primeran pasatu genuen».
Bilketa egiteko, sarreraren truke ibuprofeno kutxa bana eraman behar izan zuten haurrek. Orotara, 330dik gora haur bertaratu ziren Talokan, «bakoitza bere ibuprofeno kutxatxoarekin eskuetan. Izugarria izan da erantzuna», aitortu du.
Irribarreak ereiten
Lezon egindako bilketa, herrikide Jaione Oiartzabalek orain dela bost urte inguru hasitako proiektu solidarioa laguntzeko dela kontatu du Mitxeok. «Urtean zehar ibuprofenoak biltzen ditu Irunen, urtarrila inguruan zuzenean Senegalgo Keur Sette Awa herrira eramateko. Proiektu ederra iruditu zitzaidan, eta kafetegia bilketa egiteko leku aproposa zela ikusi nuen». Irribarreak ereiten da Oiartzabalek gidatutako proiektua.
Mitxeo bezala, ia mundu osoa zeharkatutakoa da Oiartzabal, hortik datorkie biei laguntzeko grina hori. Kontatu duenez, Senegalen bizitutako esperientzia gogor batek egitasmoa sortzera animatu zuen, haien egoera «izugarria, oso-oso prekarioa» zela ikustean. «Talibes haurrak ezagutu nituen lehen bidaietan. Euren gurasoek ezin dituzte elikatu, hortaz, esklabo izatera behartzen dituzte», dio, amorruz. Hori gutxi balitz, osasun zerbitzurik gabe bizi direla nabarmendu du irundarrak. «Herrixka horietan ez dago medikurik, ezta inolako pilularik ere». Egoera horretan, ibuprofenoa «urrea bezalakoa» dela nabarmendu du atsekabez Oiartzabalek.
Opari berezia
Iaz Lezon egindako bilketaren ostean, Afrikatik argazki ederra jaso zuela kontatu du kafetegiko jabeak. Irudi horretan, Senegalgo haurrak Eskerrik asko Taloka leloarekin batera ikus daitezke. «Sekulako indar txutea izan zen. Oso hunkituta jaso nuen argazkia, negar egiteraino», aitortu du.
Irudi horrek lezoar asko laguntza ematera bultzatu dituela nabarmendu du Mitxeok: «Jendeak beldurra izaten du ea benetan hara iritsiko den laguntza, hortaz, lasai egon daitezela. Bai ala bai, heltzen da». Datorren urtean, gainera, Gau Beltzerako espresuki egindako poltsatxoak jasoko dituzte Keur Sette Awan.
Ekintza solidarioa Gau Beltzara mugatu arren, luze joko du bilketak. Abenduaren 31era bitarte ibuprofenoak jasotzen jarraituko du Mitxeok, kafetegian bertan.
Etorkizunari begira, bilketa urtero errepikatzeko asmoa du irundarrak. «Etenik gabe errepikatuko dut. Datorren urtean, ez dut gehiegi aurreratu nahi, baina gauza berri bat pentsatu dugu, guztiontzat sorpresa polita izango da», gehitu du.
300dik gora kutxa ibuprofeno bildu dituzte aurten.
Jendetza bildu zen Gau Beltzean.
