Indarkeria matxistaren muinera joateko eskatu dute
Baionako hilketa salatu dute, Oiartzungo Feministen Asanbladak deituta. Indarkeria matxistaren kontrako neurri integralak eskatu dituzte.
Atzo arratsean egin zuten elkarretaratzea. Oiartzungo Feministen Asanbladak deituta, elkarretaratzea egin zuten atzo arratsean Done Eztebe plazan. Baionako hilketa matxista salatu zuten. Euskal Herrian hil duten laugarren emakumea da, hirugarrena Lapurdin.
Joan den larunbatean hilda topatu zuten emakume bat Baionan, etxean, bikotekideak larrialdietara deitu eta gero; hilotza ubelduraz betea zegoen, eta poliziak atxilotu egin zuen bikotekidea, hark hil zuelakoan. Aurrekariak zituen genero indarkeriagatik, eta Oiartzungo feministek salatu dute horrek ez duela ekidin hilketa.
Hego Euskal Herrian egiten ari diren hauteskunde kanpainan indarkeria matxista bera ukatzen duten hautagaiak daudela, baita arazoa xenofobiarekin mozorrotzen lotzen dutenak ere. “Baina non daude emakumeok pairatzen ditugun biolentziei aurre egiteko politika integralak eta babes neurriak? Indarkeria matxistaren muinera ez doan jendarte honetan, geroz eta ugariagoak dira zigorrean, segurtasun polizialean eta beldurrean sakontzen duten jarrerak”, salatu zuten.
Horregatik, iragarri zuten justizia patriarkalaren, kontrolaren eta xenofobiaren politiken aurrean izango direla.
“Betikotzeko tresna”
Pasa den asteburuan Durangon egin zituzten Euskal Herriko Feministen V. Jardunaldiak. Esan zutenez, han azaleratu zen indarkeria matxistaren kontra mugimendu feministak duen aitzindaritza.
“Azken hamarkadetan jendarteratu dugu emakumeon aurkako indarkeriak ez duela mugarik, bizi garen sistema kapitalista patriarkalaren ezinbesteko tresna delako, eredu honek sortzen dituen botere harremanak betikotzeko tresna”, salatu zuten. Indarkeria matxista arrazismoarekin edo klase zapalkuntzarekin lotu zuten.
Eraso matxistak modu isolatuan gertatzen ez direla esan dute, eta gizartearen esparru ia guztietan erreproduzitzen dela matxismoa. “Honen aurrean, agente sozial, politiko eta instituzional guztien ardura pertsonal eta kolektiboa ezinbestekoa da. Dena esanda dago, hitzetatik praktikara pasatzeko garaia da”, aldarrikatu zuten.
