EH Bildu, hauteskunde hauetan ere bai, nagusitu da Oiartzunen
Apirilaren 28an baino parte hartze baxuagoa izan da Oiartzunen; lau puntu. Orduan bezala, EH Bildu nagusitu da, botoen erdia baino gehiago lortuta. EAJ, bigarren.
EH Bilduk Oiartzunen duen nagusitasuna erakutsi du, historikoki mesedegarriak ez zaizkion hauteskundeetan. Oiartzunen emandako botoen erdia baino gehixeago lortu du ezkerreko koalizio subiranistak. Gainera, apirilaren 28an baino 42 boto gehiago lortu dituzte, eta ehunekotan %48 pasatxotik %52,30ra pasatu da.
Parte hartzeak lau puntu behera egin du. %74,95etik %69,94era jaitsi da. Horrek gainontzeko alderdiak zigortu ditu. EAJk (botoen laurdena lortu dute), Elkarrekin Podemosek eta PSE-EEk behera egin dute (nabarmenago koalizio moreak), eta botoetan igo den alderdi bakarrak PP eta Recortes Cero izan dira. Igoera oso arina izan da, edozein kasutan. Anekdotikoa.
Ciudadanosek, estatu osoan bezala, jipoia jaso du Oiartzunen, eta zituen botoen bi herenak galdu ditu. Eskuineko hirukotea osatzeko falta den alderdi bakarrak bi boto galdu ditu; bere hautagaiaren pegatina jartzeak ez du asko eragin.
Emaitzak (apirilekoak parentesi artean)
- EH Bildu: 2.927; %52,30 (2.885; %48,09).
- EAJ: 1.394 %24,91 (1.485; %24,75).
- Elkarrekin Podemos: 715; %12,77 (919; %15,32).
- PSE-EE: 345; %6,16 (431; %7,18).
- PP: 117; %2,09 (110; %1,83).
- Vox: 34; %0,61 (36; %0,60).
- Cs: 17; %0,30 (54; %0,90).
- Pacma: 14; %0,25 (27; %0,45).
- Aulki Zuriak: 5; %0,09 (5; %0,08).
- Recortes Cero: 5; %0,09 (3; %0,05).
- Bidezko Mundurantz: 3; %0,05 (3; %0,05).
- Euskadiko Langileen Alderdi Komunista: 2; %0,04 (5; 0,08).
