Bertso saio literarioa izango da A25aren harira antolatutako ekitaldietan lehena
Indarkeria matxistari buruzko sentsibilizatze eta kontzientziatze ekitaldiak egingo dituzte. 'Kontrako eztarritik' izango da lehenengoa.
Uxue Alberdi (Elgoibar, 1984). Azaroaren 25a indarkeria matxistaren kontrako eguna da, eta urtero, hainbat ekitaldi egiten dituzte Oiartzunen, gizartea sentsibilizatu eta kontzientziatzeko.
Aurtengo ekitaldi sorta bihar —hilak 14— hasiko da, bertso saio literario batekin. Uxue Alberdik idatzitako Kontrako eztarritik (Lisipe bilduma; Susa argitaletxea) liburua izango dute hizpide. Egungo bertsolarien bizipen eta kezkak jaso ditu elgoibartarrak, ikuspuntu feminista batetik.
Liburuaren gaia emakumeak eta bertsolaritza izanik, bi kontzeptu horiek nahastuko dituen momenturik ez da faltako. Oholtzara igoko dira Miren Artetxe, Alaia Martin eta Uxue Alberdi bera izango dira. Gai jartzaile lanetan Danele Sarriugarte arituko da.
Saioa udaletxeko pleno aretoan izango da, 19:00etan hasita. Gainontzeko ekitaldiak honakoak izango dira:
- Hilak 20, asteazkena: Kurdistango YPJ defentsei buruzko Comandante Arian dokumentala (zuzendaria: Alba Sotorra) eta El salto. Ondoren, eztabaida Euskal Herriko Bilgune Feministako eta Rojavako Brigada Feministako Maddi Gallastegirekin (udaletxeko areto nagusian, 19:00etan).
- Hilak 22, ostirala: Erradikalak ginen, gara eta izango gara. Ane Labaka bertsolaria eta Beatriz Egiazabal umorista artista (udaletxeko areto nagusian, 19:00etan).
- Hilak 23, larunbata: Autodefentsa tailerra, Maitena Monroyrekin (udaletxeko areto nagusian, 09:00-18:00).
Autodefentsa tailerra egun osoko ikastaroa izango da, elebitan, eta aldez aurretik eman beharko da izena, tokiak mugatuak direlako. Hamalau urtetik gorako edozein emakumek har dezake parte.
Izena emateko, udaletxeko harreratik pasa daiteke, edo Internet bidez egin.
