Xabier Lete omentzeko hainbat ekitaldi egingo ditu aldundiak, 2020an
Datorren urtean beteko dira hamar urte oiartzuarra hil zela. Musika eta poesia ekitaldi handi bat egingo dute, baita dokumental bat ere, besteak beste.
Gipuzkoako Foru Aldundiak Xabier Lete omenduko du 2020an, Oiartzungo poeta eta abeslaria hil zela hamar urte beteko diren urtean. Hainbat ekitaldirekin aitortuko dute Leteren lana, eta horiek iragarri dituzte.
Lehenengoa urte hasieran izango da: Xabier Lete Nazioarteko Euskarazko Poesia Saria banatuko dute. Abenduaren 5era arte aurkez daitezke lanak; euskarazkoak izan behar dute, argitaratu gabeak eta —gutxienez— 500 bertso izan beharko dituzte. Saria 12.000 eurokoa izango da.
Sari hori, Denis Itxaso Kultura diputatuaren esanetan, Letek euskarazko poesia belaunaldi oso bati egindako lanaren aitortza da. “Humanismoan eta balioen defentsan oinarritutako euskal nortasuna eraikitzeko izan zuen dedikazioa nabarmena izan zen”, esan du Itxasok.
Ekitaldia eta funtsa
Bosgarrena izango den poesia sariaz gain, beste hainbat aitortza ere egingo dizkiote poeta oiartzuarrari. Leteren ibilbideak bezala, musika eta poesia uztartuko dituen ekitaldi bat prestatzen ari direla jakinarazi dute gaur.
Horrez gain, Gipuzkoako Foru Aldundiak eskuratu zituen artistaren funtsen aukeraketa bat egiten ari da Kultura Departamendua. Aukeraketa horrekin erakusketa bat osatzeko nahi dute, EAEn erakutsiko dutena.
Eta ezohiko beste aitortza ekitaldi bat izango da artistaren bizitzari eta lanari buruz egingo dokumental baten ekoizpena. 2020ko udaren ondoren estreinatuko dutela aurreikusi dute.
Bere herrian, Mugarri
Aldundiaren ekimenari Oiartzungo Udalarena batuko zaio. Aurreratu dutenez, datorren urtean Mugarri aldizkaria bueltatuko da. Xabier Leteri buruzkoa izango da, eta Eli Perez Gaztelu ari da koordinazio lanetan.
Xabier Lete 1944ko apirilaren 5ean jaio zen Oiartzunen, eta 2010eko abenduaren 4an hil zen.