Gobernuko udal taldeekin adostu nahi ditu aurrekontuak EH Bilduk
2020ko aurrekontuaren harira proposamen zehatzak erregistratu dituzte Pasaiako Udalean, pasaitarren bizitza kalitatea hobetzearren eta jasotako konfiantzari erantzuteko.
elkarlanerako prestutasuna agertu die Pasaiako EH Bilduk beste alderdiei. Azken hiletan hainbatetan egin bezala, elkarlanerako prestutasuna agertu die Pasaiako EH Bilduk beste alderdiei. Kasu honetan, 2020ko aurrekontua udal gobernuko alderdiekin —PSE-EE eta EAJ— adostu nahi duela jakinarazi du koalizio abertzaleak, oposizioan izan arren, Udal Hauteskundeetan indar politiko bozkatuena izan ziren eta. Kontutan hartu behar da gainera, EH Bildu berriz ere irabazle izan zela Espainiako Gorteetarako Hauteskundeetan, lau alderdi nagusien artea boto kopurua handitu zuen bakarra izanik.
EH Bilduk egindako proposamena, kultur, hezkuntza, kirol eta gizarte ekintzako arloetan eragin nahi du. Boluntariotzan ari diren kultur eta aisialdi elkarteei bideratzen zaizkien diru-laguntzak handitzearen alde egin dute. Herriko jaiei bideratutako diru kopuruari ordea, emendakina jartzea erabaki dute. Era berean, larrialdi sozialei zuzendutako diru-partida handitzea nahi dute, zaurgarritasun dauden herritarrei babesa bermatzeko.
Berrikuntzak dakartza koalizioa abertzalearen proposamenak, Eskola Kultura egitasmoa sortzeko diru-partida bat eskatu baitute. Funtsean, Eskola Kirolak gazteen artean kirola sustatzen duen bezala, kultura sustatuko lukeen programa izango litzateke Eskola Kultura.
Dena dela, egindako proposamena 2020ko aurrekontuez harago doala adierazi dute EH Bilduko kideek, beste herri modelo bat bultzatzean datza. Pasaiari ekonomikoki zein ekologikoki eragiten dioten hainbat sektore, beste erakunde batzuen menpe daudenez, ezinbestekotzat dute Pasaiako Udaleko talde politikoek elkarrekin lan egitea, erakunde horien aurrean sendotasunez erantzun ahal izateko.
Aldundiari ere mezua bidali diote; Udal Foru Funtsak —aldundiek udalerriei ematen dieten dirua banatzeko irizpideak—Pasaiak dituen erronka estrukturalak aintzat hartzen ez dituela salatu dute. kasu paradigamtiko gisa, garatu gabe dauden Donibaneko saneamendua, zaharren egoitza edota Topoaren lurperatzea aipatu dituzte. Horiei eta beste batzuei herri gisa erantzuteko eskua luzatuta izango duela helarazi dio Izaskun Gomez alkateari Pasaiako EH Bilduk.
