Kazabonek eta Mitxelenak ilustraziodun liburu bana aurkeztu dute
Mitxelenari Peru Abarka Lehiaketa irabazi zuen 'Erakusleihoan' lana argitaratu dio Ereinek. Kazabonek Benito Lertxundiri buruzko biografia ondu du.
Karmele Mitxelenaren lana Erein argitaletxeak publikatu du [Argazkia: erein.eus]. Aste honetan bi oiartzuarrek liburu bana aurkeztu dute. Karmele Mitxelenak Erakusleihoan argitaratu du, Erein argitaletxearekin. Helduentzako album ilustratua da, eta irudiak Irrimarrak taldeak —Irene Gutierrezek eta Karmele Gorroño— egin ditu.
Erakusleihoan-ekin 2019ko Markina-Xemeingo Udalak antolatutako Peru Abarka Lehiaketako narrazio saria irabazi zuen martxoan.
Epaimahaikideek saria ematerakoan jakinarazi zutenez (Lea-Artibaiko Hitzak jaso zuen bezala), Mitxelenak harreman latz eta hotza kontatzen du narrazio horretan, baina irakurlea harrapatu eta bereganatzea lortzen du, hitz eta pasarte landuak eta dotoreekin.
Kazabonek, Lertxundi
Antton Kazabonek Orion aurkeztu du biografia ilustratua [Argazkia: orio.eus].
Antton Kazabonek, berriz, Benito Lertxundi naiz biografia argitaratu du Denon Artean argitaletxearekin. Orioko kantariaren lana jaso du Kazabonek, eta Ainhoa Redondok ilustratu du. Lau urtetik gorako haurrentzako izango da.
Oiartzuarrak ziurtatu duenez, euskal kulturan eta euskalgintzan, oro har, pisu handia izan duten pertsona askok ez dute haiei buruzko taxuzko testurik. Kultur ondareren transmisio horretan bere ekarpena egin nahi du Kazabonek.
