Arditurri inguruko urubiak ikustera joango dira
Hilaren 30ean ibilaldia egingo dute, Arditurri inguruetan. Nerea Pagaldaik emango ditu hegazti horiei buruzko azalpenak. Aldez aurretik eman behar da izena.
Urubia ezagutzeko aukera polita izango da.
Udazkena omen da urubiak bezalako hegaztiak ezagutzeko sasoirik onena, kantuak bereizteko momentu onena delako. Horregatik, Gipuzkoako Parketxe Sareak ibilaldia antolatu du hurrengo larunbaterako —hilak 30—.
Hontza mota hori gainontzekoetatik bereizteko zein hegaztiaren berezitasunei buruzko azalpenak emango ditu Nerea Pagaldai adituak. Ibilaldi bat egingo dute, zailtasunik gabekoa, Arditurriko parketxetik 19:00etan abiatuta.
Lehendabizi azalpenak emango dituzte, interpretazio zentroan, eta ondoren pare bat orduko ibilaldia egingo dute. Edozein adinetako pertsonei zuzendutako jarduera izango da, eta bost euroko prezioa izango du. Linterna eramatea komenigarria dela ohartarazi dute. Euskaraz izango da.
Ohi bezala, aldez aurretik egin beharko da erreserba. Horretarako, honako bi telefono zenbaki hauetako batera deitu beharko da: 943 495 069 edo 688 895 068. E-posta bidez ere jar daiteke harremanetan.
