Elikadura osasuntsuari buruzko hitzaldia emango du Maria Manerak
Labore Oarsok antolatzen duen hitzaldi zikloko hurrengoa gurasoei eskainitakoa izango da. Manerak hainbat argibide emango ditu ostiralean.
Labore Oarso kontsumo kooperatibak (ia) ostiralero zita jartzen du bere lokalean. Datorren ostiralerako —hilak 13—, Maria Manera nutrizionista gonbidatu dute. Haurtzaroan elikadura osasuntsua izateko hainbat argibide emango ditu nutrizionistak. Manerak Elikadura osasuntsua haurtzaroan: jan, hazi, gozatu eta ikasi lelopean emango du hitzaldia, gazteleraz, euskaraz baino hobe adierazten baita —oraingoz—.
Guraso direnentzako hitzaldia denez, haur zaintza zerbitzua eskainiko dute Paperezko Ametsen gelan. Maneraren hitzaldiak irauten duen bitartean eskulan tailerra eskainiko dute.
Tailerrerako plaza mugatuak direnez eta antolaketa errazte aldera, haurrak eramango dituztenek aurretik izen ematea beharrezkoa izango da (bihar izango da azkeneko eguna).
Bestalde, Labore Oarsoko kideek eskaera egin dute, aparkaleku arazoak saihesteko. Hitzaldira joan behar dutenei eskatu diete autoa utz dezaten egoitzaren pareko industriagunean edo futbol zelaiaren aparkalekuan. Hartara, dendara erosketak egitera joaten direnek tokia izango dute.