Karlos Saldise oroitzeko egitarau zabala osatu dute
Momentuz, 40. urteurrenari begira egin duten logoa zabaldu dute. Horrekin batera, mahai ingurua, aldizkaria, ekitaldia eta bazkaria ere iragarri dituzte baina horiek baino askoz ere gehiago antolatu dituzte.
Saldise oroitzeko sortu duten logoa. 2020ko urtarrilaren 16an 40 urte beteko dira Karlos Saldise Korta lezoarra hil zutela etxeko atarian. Grupos Armados Españoles eta Batallon Vasco Español eskuin muturreko talde paramilitarrek hartu zuten hilketa bere gain. Handik hiru hilabetera artxibatu zuten kasua, errudunik gabe. Saldisen euskararekiko eta euskal kulturarekiko atxikimendua aski ezaguna zen herrian, eta Lezoko Amnistiaren Aldeko Batzordeetako militantea zen.
Lau hamarkada horietan hutsik egin gabe oroitu dute lezoarra, eta datorren urtean beteko den 40 urteurrenaren harira egitarau zabala prestatzen ari dira. Momentuz, 40. urteurrenari begira egin duten logoa zabaldu dute. Horrekin batera, mahai ingurua, aldizkaria, ekitaldia eta bazkaria ere iragarri dituzte baina horiek baino askoz ere gehiago antolatu dituzte.
Azken hilabeteetan egindako lanketa horretan Egiari Zor fundazioko kideak izan dituzte bidaide. Aldizkariaren atzean, berriz, Piztu Lezo dinamika dago. Garai bateko Orratx! herri aldizkaria berreskuratzeko apustua egin du, eta datorren astean aterako du lehen alea, eta tartean Karlos Saldiseren erailketaren urteurrenaz arituko da. Hilaren 30ean berriz, Iñaki Egaña historialariak gazteei begirako hitzaldia eskainiko du 20:00etan Ibaiondon; azken hori ere, Saldiseren erailketaren 40. urteurrenaren harira.
Egitarauan bildutakoak datozen egunetan publiko egingo dituztela esan dute antolatzaileek.
