EH Bildu: "Arreta edukietan baino formetan jartzen saiatu da gobernu taldea"
Emendakinak egin behar ziren lekuan eta moduan egin zituela esan du EH Bilduk, eta hori probatzeko, batzordeko aktak eta Osoko Bilkurako aktak begiratzea baino ez dagoela.
Lezoko EH Bilduko kideak, hauteskundeetarako zerrenda aurkezteko unean. Aurrekontuen gainean negoziatzeko asmorik ez izatea egotzi zion EH Bilduk gobernu taldeari (EAJ eta PSE-EEk osatzen dute), baita politika sozialetan murrizketak egin izana leporatu, eta horren harira, erantzuna helarazi zuen prentsa ohar bidez gobernu taldeak. EH Bilduri emendakinak behar bezala ez aurkeztea egotzi zion, eta ukatu negoziatzeko borondaterik ez zeukala. Orain, EH Bilduk erantzun egin dio gobernu taldearen adierazpenari, “gobernu taldeak bilatzen duen ika mikan jarraitzeko asmorik ez badugu ere”.
EAJ eta PSE-EEri, egindako lana “lokaztea” leporatu dio koalizio subiranistak eta edukietan jarri beharrean arreta forman jarri izana arbuiatu du; “kaleratu duten oharrak udal aurrekontuaren inguruan egin dugun kritika egokia eta mamitsua dela, eta eman genuen aurkako botoa zuzena izan zela baino ez digu baieztatzen”. Arreta edukietan jarri behar dela esan du gainera, “proposatu genituen 300.000 euroko emendakinak onak dira lezoarrentzat? herritarren ongizatea hobetzeko, genero berdintasunean urratsak egiteko baliagarriak dira? Alegia, EAJ-PSE-EEk onartutako aurrekontuei kolore gorriagoa edo sozialagoa, moreagoa edo feministagoa, berdeagoa edo ekologikoagoa ematen die? egokia da politika sozialetan murrizketak egin dituzten bitartean zinegotzi liberatuen soldatak %32a igotzea? Gobernu taldeak horri guztiari erantzun behar lioke”.
Hala ere, emendakinak egin behar ziren lekuan eta moduan egin zituela esan du EH Bilduk, eta hori probatzeko, batzordeko aktak eta Osoko Bilkurako aktak begiratzea baino ez dagoela erantsi, “argi eta garbi azaltzen da emendakinen ezberdinen 300.000 euroko zenbatekoa zein partidetatik aldatzea proposatzen genuen, aurrekontuak orekatuz —gobernu taldearen idatzian, aurrekontua nola doitu zehaztu ez izana leporatu zioten koalizio subiranistari— oso ondo dakite beraz ez dela egia egin zuten baieztapena”.
Aktetan bestalde, EH Bilduk aurkeztutako emendakinak bozkatzeko eskubidea zutela zion udal idazkariaren oharpena jasota dagoela nabarmendu du gainera koalizioak. Gezurtatu egin du halaber gobernu taldeak proposamenik egin zionik EH Bilduri, “gezurra, non aurkeztu zituzten proposamenak; ez batzordean, ezta osoko bilkuran ere. Berriro ere aktak begiratzea baino ez dago dioguna egiaztatzeko”.
Halako eztabaidak ekiditeko proposamena erregistratuko duela alkateari zuzenduta jakinarazi du azkenik EH Bilduk. Horren arabera, aurrerantzean batzordeak zein osoko bilkurak bideoz grabatzeko eskatuko dute, “herritarrek gertatzen den guztiaren berri ahalik eta garbien izan dezaten; erraza, merkea eta guztiz egingarria da”.
