EH Bilduk aurrekontuen gaineko proposamena ez zuela erregistratu esan du gobernu taldeak
Emendakinak "behar bezala" ez lantzea, eta erregistroan aurkeztu ez izana egotzi dio EH Bilduri udal gobernuak, "horrek eztabaidatzea eta bozkatzea eragotzi du".
Aurretik egindako pleno baten irudia. Aurrekontuen gaineko negoziaziorako borondaterik ez izatea leporatu dio EH Bilduk gaur prentsa ohar bidez gobernu taldeari. Onartutako aurrekontuan gainera, politika sozialetan murrizketak egin izana ere egotzi dio. Adierazpen horiei erantzun die orain gobernu taldeak. Esan duenez, aurrekontua aztertzeko plenoa baino astebete lehenago batzordea egin zuten, eta EH Bilduk gobernu taldearen aurrekontu proiektuari “proposamen berriak” egin zizkion, baina ez zituen ondoren udal erregistroan aurkeztu.
Hamabi kontu sailetan igoera proposatu bai, baina horiek gauzatu ahal izateko aurrekontuaren oreka bermatzeko zein sailetatik gutxitu zehaztu ez izana ere egotzi dio koalizio subiranistari udal gobernuak, “hamabi kontu sail handitzea besterik ez zuen proposatu, igoera horiek aurrekontuan nola orekatu ez zuen aipatu ere egin, ordea. EH Bilduk aurkeztutakoak, beraz, proposamenak ziren eta ez emendakinak, emendakinek kontu sailen igoera eta jaitsiera jaso behar dutelako aurrekontuaren oreka bermatu, ondoren bozkatu, eta aurrekontu dokumentuan txertatu ahal izateko. Baldintza horiek betetzen ez badira, ezin dira osoko bilkuran tratatuak edota bozkatuak izan”.
Hala ere “elkarlanerako” eta “adostasunerako” borondatea erakutsi zuela gobernu taldeak gaineratu du, “proposamen horietatik zazpi txertatzea onartu genuen, betiere, Lezo zein lezoarren eta udalaren egungo errealitatera eta beharretara egokituta”. Azaroaren 28ko osoko bilkuran proposamen horiek txertatzea proposatu eta EH Bilduk “uko egin ziola” aukera horri gaineratu du udal gobernuak, “eta azaroaren 21eko batzordean aurkeztutako proposamen berak aurkezteko eskaera egin zuen. Horren aurrean, EH Bilduren proposamenak ez zeudela emendakin gisa behar bezala landuta, aurrekontuaren oreka ez zutela aurreikusten ezta bermatzen ere, eta horrenbestez, bozka ezinak zirela, udal gobernuak lehendabizikoz aurkeztutako aurrekontu proiektua bozkatzea erabaki zuen”.
Kontu hartzailearen soldata igoerari ere egin dio erreferentzia gobernu taldeak. Kontu hartzailearen oinarrizko soldataren %13ko igoera onartu zela PSE eta EAJren bozkekin, “horretarako arrazoirik ez zegoenean” salatu zuen koalizio subiranistak. Igoera hori dedikazio plusari dagokiola erantzun du udal gobernuak, “horren arabera kontu hartzaileak erabateko dedikazioa izango du Lezoko Udalean”.
