Beraungo kirol guneko pista zati bat estaltzeko lanak hasi dituzte
Lan horiek, kirol gune hori birgaitzeko proiektuaren barruan kokatu ditu udalak. Lehenengo fasea izango da honakoa.
Beraungo kirol guneko atletismo pistaren mendebaldeko bihurgunea estaltzeko lanak hasi zituzten joan den astean; lan horiek, kirol gune hori birgaitzeko proiektuaren barruan kokatu ditu udalak. Lehenengo fasea izango da honakoa, eta metalezko egitura baten eta polikarbonatozko xaflen bidez futbol 11 zelaiaren mendebaldean dagoen ilargi erdiaren forma duen pistaren azalera estaliko dute, “horrela eguraldi txarra egiten duenean ere atletismo taldeek entrenatu ahal izango dute busti gabe”.
Beraungo kirol gunea birgaitzeko proiektu orokorrarekin ekipamenduaren zahartzeak eragin duen hondatze prozesuari erantzun nahi dio, baita erabilera eskaera berriei ere.
Faseka jardungo dute : atletismo pista estaliko dute lehenik; harmailak eta sarrera estaliko dute B fasean; Taberna eta komunak berrituko dituzte ondoren; Kirol zoluak; instalazio elektrikoak; eta pistetako argiak aldatu, azkenik. Sei jarduketa aurreikusi dituzte proiektuaren barruan.
