Euskal Herriko Pala Txapelketa Irekian izena eman daiteke
Girizia elkartearen pilota sailak antolatzen duen txapelketaren XXXVII. ekitaldia izango da aurtengoa. Hilaren 31ra arte eman daiteke izena.
2019ko txapelketako finalistak.
Girizia elkartearen pilota sailaren pala txapelketa klasikoena bueltatuko da datorren urtean. Lehenago, baina, izena eman beharko da, eta parte hartu nahi duten bikoteek hilaren 31ra arte izango dute horretarako aukera.
Bikoteek e-posta bidez eman dezakete izena, edo 656 71 12 75 telefono zenbakira deituta. Partidak, Oiartzungo Madalensoro pilotalekuan jokatuko dira larunbat goiz eta arratsaldetan eta igande eta jai egunetan goiz partean.
Txapelketaren formatuari dagokionez, gizonentzako hiru maila egongo dira (lehenengoa, bigarrena eta hirugarrena), eta emakumeentzako, bi (Gazte Maila eta Helduen Maila).
2020koa, Girizia elkarteak jarraian antolatzen duen XXXVII. ekitaldia izango da, eta azken urteetan bezala, Josetxo Gamio elkarteko pilotari izandakoaren omenezkoa izango da. Euskal Herriko Pala Txapelketa Irekia izenarekin hamaseigarren aldia izango du.
Bitartean, Xanisteban Eguneko banakako pala txapelketa aurrera doa. Finalak hilaren 26an jokatuko dituzte: 18:15ean, kimuen txanda izango da; 18:35ean, Haur Mailakoena; gizonen kontsolazio finala, 19:00etan; eta 19:45ean, final handia.
