Manuel Lekuona beka emango du udalak, parrokiako organoa ikertzeko
San Esteban elizako Cavaille-Coll organoa ikertzeko emango dute aurtengo beka. 3.950 euro izango ditu bekadunak. Proiektua urtarrilaren 31ra arte aurkez daiteke.
Cavaille-Coll motakoa da organoa. Oiartzungo Udalak Manuel Lekuona beka emango du, San Esteban parrokiako organoaren historia ikertzeko. Beka horren zenbatekoa 3.950 eurokoa izango da.
Beka eskuratu nahi duenak urtarrilaren 31ra arte dauka bere ikerketa proiektua aurkezteko epea. Txosten laburpenak hamar eta hogei orrialde artean izan beharko du, eta bertan azaldu beharko dituzte proiektuaren oinarrizko nondik-norakoak, metodologia, aztergaiak, erabiliko dituzten iturburuak eta lana zein hizkuntzatan idatziko duten.
Horrez gain, eskatzaileak aurkeztu beharko ditu bere tituluak, baita merituak zein lan egoera ere. Manuel Lekuona bekaren oinarri guztiak irakur daitezke Oiartzungo Udalaren Kultura Sailaren web orrialdean.
1861an eskuratuta
Oiartzungo elizako Cavaille-Coll organoa 1842an eraiki zuten Parisen eta 1861ean erosi zuen Oiartzungo Udalak. Ordutik dago San Esteban parrokian dago. Fabrikazioa, ezaugarriak, egileak, tailerrak, konponketak, organojoleak, lekualdatzeak… ikertzea izango da Manuel Lekuona bekaren helburua.
Aditu-talde batek osatuko duen epaimahaiak erabakiko du zein proiekturi eman beka. Ikerketa egiteko epea 2020ko irailaren 30a izango da. Lana euskaraz edo elebitan (euskaraz eta gazteleraz edo, euskaraz eta frantsesez) aurkeztu ahal izango da.
