Babesgabetasuna duten haurrentzako eta familientzako laguntzak onartu dituzte
Urteko azkeneko plenoa egin dute. Hamasei puntu aztertu dituzte, azkar asko, alor askotarikoak. Agustin Lekuonak egin zituen alkate lanak.
Konturatzerako, urtea bera joan egiten da. Eta urte berria azkar ere hasten da, hamabi kanpai-hots erreskadarekin. Atzo urteko azkeneko udalbatzarra egin zuten, eta modu berean joan zen: arin, eta aho batez onartuta.
Agustin Lekuonak egin zituen alkate-presidente paperak, Jexux Leonet falta zelako. Hamasei puntuko gai zerrenda izan zuten mahai gainean. Esanguratsuenak izan ziren gaiak Gizarte-Ongizate Sailarekin lotutako pare bat puntu bat izan ziren. Zehazki, egoera zailean dauden haurrentzako diru laguntzak bideratzea, baita familientzakoa ere. Kontzeptu bakoitzarentzako 35.000 euro bideratuko dituzte.
Administrazio elektronikoarekin zerikusia duten gai jorratu zituzten. Alde batetik, Segurtasun Eskema Nazionalak agindutakoaren arabera, informazio sistema segurtatzea. Bestetik, lurralde historiko, autonomia erkidego eta estatuek duten lankidetza hitzarmeneko protokoloarekin bat egitea.
BPXportekin, urtebete gehiago
Orain dela bi urte BPXport enpresak Elorsoro kiroldegia, Madalensoro pilotalekua eta udako igerilekuak kudeatzeko kontratua eskuratu zuen. Kontratu hori bukatu da, eta urte banako bi luzapenerako aukera ematen zuten klausula egikaritu, eta beste urte batez kudeatuko du enpresa berak.
Bestalde, Gipuzkoako haur eta gazteen sustapenerako erakunde arteko sareari —Gaztematikari— atxikitzea onartu zuten.
Beste puntuei dagokienez, Ibargain musika eskolarako diru laguntzaren bigarren ordainketa onartu zuten. Horrez gain, Olarri dantza taldearekin lau urteko lankidetza hitzarmena adostu zuten: udalak urtero 6.000 euroko diru laguntza emango die, eta Karaez 4ko lokala laga.
