Hilaren 31ra arte aurkez daitezke Mariasun Landa Sarietarako lanak
Aurtengoan ere bi sari emango dituzte. Udaletxeko erregistroan aurkeztu behar dira lanak.
Iazko edizioko sari emate ekitaldiko irudia. Martxan da 2020k0 Mariasun Landa Sarietarako lanak aurkezteko epea. Hilaren 31ra arte eraman daitezke Errenteriako Udaleko erregistrora (udaletxean dago). Sariketaren hamargarren ekitaldia da aurtengoa, eta Errenteriako Udaleko Berdintasun Azpisailak antolatu du.
Gizarteko arlo ezberdinetan emakumeek Errenteriari egindako ekarpenaren berri emango duten idazlanak dira sariketaren filosofiarekin bat egiten dutenak, horiek sustatu, aitortu eta saritu nahi dituzte. Emakumeen ekarpen hori askotariko arloetara zabalik dago, hala nola, kulturara, hezkuntzara, kirolera, enplegura eta bestelakoetara. Emakumeek herriari egindako ekarpena ikusarazi nahi da, herri kronika osatze aldera.
Bi sari emango dituzte. Bat, Emakumezkoen Begirada da: emakume batek edo emakumez osatutako talde batek aurkeztutako lanen artean onena sarituko da, 450 eurorekin. Bestea, berriz, Emakumezkoei Begirada da: gainerako lan guztien artean onena sarituko da, 450 eurorekin ere bai. Bi idazlan irabazleen artean, bat gutxienez euskaraz aurkeztutakoa izango da.
Sari banaketaren ondoren (Martxoaren 8aren inguruan izaten da), bi idazlan irabazleak Oarso aldizkarian publikatuko dituzte, eta Errenteriako Udalak jakinarazi du ahalegina egingo duela hedabide orokorretan ere ager daitezen.
Sariketaren oinarri orokorretara sartu nahi bada, joan ondoko estekara: 2020ko Mariasun Landa Sariak, oinarri orokorrak.
