'Oarso' aldizkarirako artikuluak aurkezteko epea zabalik da
Lanak apirilaren 24ra arte aurkeztu daitezke. Deialdi berezia egin du erredakzio batzordeak euskaraz idatzitakoak eta emakume kolaboratzaileen kopuruak gora egin dezan.
Iazko 'Oarso' aldizkariaren azala. Oarso aldizkariaren aurtengo edizioa prestatzen hasi dira jada erredakzio taldeko kideak, eta dagoeneko zabalik da artikuluak aurkezteko epea. Errenteriaren 700. urteurrena ospatuko da aurten eta aldizkariaren ardatz nagusi gisa gai hori garatu nahi du erredakzio batzordeak: “Urteurren hau aukera ezin hobea da nondik gatozen, egun nor garen, eta bereziki zer izan nahi dugu galdetzeko geure buruari; Errenterian bizi garenok osatzen dugun gutasuna ospatzeko eta indartzeko balio behar du”. Horrenbestez, Errenteriak zein paper jokatuko lukeen hausnartzeko tartea ere eskainiko dio aldizkariak.
Deialdi berezia egin die herritarrei parte har dezaten aldizkarian, hura “atsegina eta askotarikoa” izan dadin, “eta Errenteriako bizi modu aktiboa islatu dezan”. Gaia mugatzeko asmorik gabe, aldizkariko ohiko gaiak ere gogoratu ditu batzordeak, eta oroitzapenek, ospakizunek, pertsonaia ospetsuek, edota aurten kontsiderazio berezia izan dutenen gaineko artikuluak ere onartuko dituzte. Horretaz gain, urtean zehar herrian izan diren gertakariak ere jasoko ditu.
Oarso aldizkarian edonork kolabora dezake arauak betetzen dituen idatzi bat aurkeztuta (hemen arauak).
Euskaraz idatzitako artikuluei erreparatu die erredakzio batzordeak. Bilakaera ona izan badu ere euskaraz idatzitakoen portzentajeak, gai horren garrantzia nabarmendu eta euskaraz idaztera animatu dituzte herritarrak. Era berean, deialdi berezia egin die emakumeei; izan ere egun kolektibo hori minoritarioa da kolaboratzaileen artean. Lanak aurkezteko epea apirilaren 24an amaituko da; lanak berriz, posta elektronikoz helarazi, edota Zu! Arreta zerbitzuan zein udal artxiboan utzi daitezke.
Zalantzak argitzeko, berriz 943 449 610 edota 943 449 626 telefono zenbakira deitu daiteke astelehenetik ostiralera 08:00etatik 14:00etara.
