U-30eko greba orokorra babestera deitzen duen mozioa aurkeztu du EH Bilduk
Hilaren 28an izango du plenoak osoko bilkura eta mozioa bertan eztabaidatzea nahi du koalizio subiranistak.
Udal erregistroan mozioa aurkezteko unean. Argazkia: EH Bildu Hilaren 30erako Euskal Herriko Eskubide Sozialen kartak deitu duen greba orokorraren harira, mozioa aurkeztu du Pasaiako EH Bilduk. Hilaren 28an izango du plenoak osoko bilkura eta bertan eztabaidatzea nahi du koalizio subiranistak. Greba hori, bizitza duinaren aldeko borrokan lanean diharduten mugimendu ezberdinek bat egiteko aukera berria den zalantzarik ez duela esan du EH Bilduk, “hala nola, pentsiodunak, feministak, euskal sindikatuak, ekologistek eta abar batuko gaitu”. Arrazoi horregatik, garrantzitsua iritzi dio indarrak batzeari, “eta denok elkarrekin planto egiteari”.
Grebaren hiru aldarri nagusiak ekarri ditu gogora: lan duina, pentsio duinak eta bizitza duina, “bat egiten dute EH Bildun lehenetsiak ditugun lan ildoekin, eta gainera, gure ustez, aldarrikapen hauek hiru modutara gauzatu ahalko dira: erabakitzeko eskubidea eskuratuz, instituzioetatik bestelako politika publikoak eginez, eta patronala horretara behartuz. laburbilduz, burujabetza eta udalgintza herrigilearen eraikuntza”.
Pasaiako EH Bilduko kideek bat egin dute Karta Sozialak egin duen greba deialdiarekin eta pasaitar guztiak herrian sortu diren greba batzordeetan eta greba egunean bertan gauzatzen diren mobilizazioetan parte hartzera deitu dituzte. Halaber, “guztion” bizi baldintzak hobetzeko, eta “sistema neoliberalak ezarri nahi duen prekarizazioari” aurre egiteko azken urteetan abiatutako mobilizazio sozial handiei erreparatu die koalizio subiranistak, “pentsiodunak, mugimendu feminista, gazte mugimendua, langile kolektibo ezberdinak, Korrika, errefuxiatuen aldeko iniziatibak, klima aldaketari aurre egiteko mobilizazioak”.
Mozioa, aipatu moduan, hilaren 28an landuko du plenoak. Hemen mozioa osorik irakur daiteke.
