Gladys del Estal ekintzaile antinuklearra oroituko dute, hura erail eta 40 urtera
Tuteran egindako zentral nuklearren kontrako protesta baketsu batean parte hartzean ari zela hil zuen guardia zibil batek gazte donostiarra duela 40 urte.
Gladys del Estal Ferreñoren hileta eguneko irudi bat bera bizi zen Donostiako Egia auzoan. Argazkia: Eguzki Gladys del Estal ekologista donostiarra hil zutela 40 urte bete ziren pasa den ekainaren 3an. Jose Martinez Salas guardia zibilak buruan tiro bat jota erail zuen gaztea Tuteran. Energia nuklearraren kontrako ekintza eguna antolatu zuten mundu osoan 1979ko ekainaren 3an (Pennsylvania, AEB) Three Mile Island zentral nuklearrean izandako istripua salatzeko. Euskal Herrian, Tutera aukeratu zuten protesta baketsua egiteko, Arguedasen, zentral nuklear bat eraiki nahi zutelako, eta gainera, bertan zegoelako Bardeako tiro eremua. Protesta horretan parte hartzen ari zela hil zuen guardia zibilak gazte donostiarra
Del Estal oroitzeko Gladys Gogoan iniziatibak eta Eguzki Talde Antinuklear eta Ekologistak egitarau aberatsa antolatu zuten Euskal Herrian, eta tartean, datorren astelehenetik aurrera, erakusketa zabalduko dute Errenteria-Oreretako Xenpelar Etxean.
Ibiltaria da erakusketa eta testu labur batez eta batez ere argazkiekin Gladys nor zen azaltzen du, zergatik zegoen zorigaiztoko egun hartan Tuteran, nola hil zuten, eta bere hilketak zer nolako herri erantzuna eragin zuen. Garai hartan indarrean zegoen eta gaur egun ere indarrean dagoen borroka antinuklear eta ekologistaren testuingurua ere bildu dute erakusketara.
Zigorrik gabe gelditu zen gazte donostiarraren hilketa. Eguzkik nabarmendu duenez, gaur egun, “bizi-bizirik” daude Gladys del Estal Tuterara eraman zuten arrazoiak “klima larrialdi eta krisi ekologiko garai hauetan. Horregatik oroitu nahi dugu Gladys, gutako bat izan zelako, bere hilketaren bidegabekeria ahazterik ez dugulako, eta zigorrik gabe geratu zelako”. Izan ere, del Estal erail zuen guardia zibila, 1981eko abenduan epaitu zuten Iruñean; «arduragabekeriaz» jokatu zuela esan zuen epaiak, eta hemezortzi hilabeteko espetxealdia ezarri. Espetxealdi hori ez zuen osorik bete. 1992 urtean Martínez Salas guardia zibilak Espainiako meritu militarraren domina jaso zuen.
Erakusketa datorren astelehenean (hilak 20) zabalduko dute Xenpelar Etxean eta bisita orduak astelehenetik ostiralera 17:00etatik 20:00etara dira. Erakusketa otsailaren 15era arte izango da zabalik Xenpelar Etxean.
