Luzuriaga salatu duen gaixoari babesa emateko elkarretaratzea egingo dute ostiralean
1958 eta 1990. urteen artean Luzuriagan lan egin zuen langileari Mesotelioma Pleurala diagnostikatu zioten amianto zuntzak arnastearen ondorioz. Donostiako auzitegien aurrean egingo dute elkarretaratzea.
Langile ohiak urte askoz egin zuen lan Antxoko Luzuriagan. Ostiralean hasiko da Victorio Luzuriaga S.A. enpresaren aurkako auzia, bertan aritutako langile ohi batek garatutako gaixotasunean izan dezakeen ardura epaitzeko. Gaixoari babesa adierazteko, ASVIAMIE, Euskadiko Amiantoaren Biktimen Elkarteak, elkarretaratzea deitu du ostiralerako, 11:45ean Donostiako lehen Auzitegi Sozialaren atarian. Halako kasuak gaixotasun profesionaltzat hartzeko eskatuko dute, baita amiantoaren biktimen kalte-ordainen funts bat sortzea ere.
1958 eta 1990 bitarte jardun zuen gizonak modelista gisa Luzuriagaren lantokietan Antxon, Usurbil eta Tafallan. 2018an Mesotelioma Pleural gaiztoa diagnostikatu zioten eta urte berean. Donostiako Ospitaleko Anatomia Arloaren arabera, amianto zuntzak arnastearen ondorio da Mesotelioma Pleurala. Modelisten lantokian amiantorik egon ez arren, asteburuetan mantenu lanak egin zituen maiz salatzaileak beste gune batzuetan, bertako produktu toxikoak arnastuz. Gaitzaren ondorioz langile ohiaren bizi kalitatea nabarmen okertu da, eta gaur egun ezgaitasun osoa aitortu diote. Gauzak horrela, gizonak 294.468 euroko kalte-ordainak eskatu ditu.
XX. mendean Euskal Herriko industria askotan erabili zen materiala da Amiantoa, batez ere siderurgia eta metalurgian. Labe garaiak eta bestelakoak isolatzeko erabili ohi zen, baina haren zuntza txiki eta toxikoek ondorio larriak dituzte urteek aurrera egin ahala. Tartean, hainbat minbizia mota eragin ditzakeela frogatu da.
