Musikastek, Jose Luis Ansorena oroituko du aurten
Eresbilek 2019ko balantzea egin du gaur Donostiako Koldo Mitxelena Kulturgunean, eta aurten dituen erronka nagusiak aurkeztu ditu. Balantzearen barruan, garrantzia berezia eman dio Arantzazuko Musika artxibo zaharra katalogatu ostean martxan jarri duen webguneari.
Mark Barnes eta Jon Bagües gaurko agerraldian. Eresbil Musikaren Euskal Artxiboak 2019aren balantzea egin du gaur Donostiako Koldo Mitxelena Kulturgunean. Jose Luis Ansorenarentzat, besteak beste Musikaste eta Eresbilen sortzailearentzat, izan dira lehen hitzak. Merezitako hitzak eta aitortza Jon Bagües Erriondo Eresbileko zuzendariarenak, euskal musikaren erreferente ezinbestekoa izan baitzen errenteriarra. Horren harira, aurrerapena ere egin du Bagüesek, Mark Barnesekin batera egin duen agerraldian: “Aurtengo Musikastek Jose Luis Ansorena oroituko du, Errenteriako abesbatza garrantzitsuenek interpretatutako programa bereziarekin”.
Balantzeari dagokionean, bereziki nabarmendu du Eresbilen zuzendariak aurten musikaren euskal artxiboak Arantzazuko musika artxibo zaharra katalogatzeko egin duen lan eskerga, eta haren emaitza den webgune berria, Arantzazu Musikan. Bi urte luzeko lana dago katalogo horren atzean, Barnesek egindakoa. “Lanarekin Arantzazuko Santutegiko musika artxibo zaharra birkatalogatzeko prozesua osatu da—azaldu du Bagüesek— eta 1834 urtearen aurretik idatziak diren 203 egile eta 1.384 obra katalogatu ditugu”. 1834. urtean komentua erre eta itxi egin zen. Sutetik komentu zaharra zeneko dorrea baino ez zen libratu, eta bertan aurkitu zituzten artxibo horiek guztiak gordeta XX. mende hasieran. “Altxor” handienetako bat dela esan du Barnesek, eta ilusio berezia egin diola Eresbili lan horren emaitzak. Anonimoak ziren lanak identifikatu dituzte, guztiak egitea ezinezkoa izan bada ere: “Nahikoa zaila izan da katalogazioa, lan handia suposatu du eta Euskal Herriko artxibo zaharrena guztiz normalizatua dagoela esan dezakegu lanketa honen ostean”.
Ilusio gehien sortu dien emaitza Arantzazukoa izan da, baina ez da Eresbilek egin duen lan bakarra, inondik inora ere. 2019an, ohi bezala, dokumentu eta funts asko sartu dira Eresbilen: 263.395 guztira. Horietatik gehienak ikus-entzunezko dokumentuak dira, 116.124; partiturak, 98.035; askotariko dokumentazio erregistroak, 27.640; eta bilduma eta liburutegi dokumentuak, berriz, 21.596.
Datu horietatik kanpo utzi dituzte dohaintzan emandako edo utzitako dokumentu funtsetan sartutako materialak, baina horiek ere asko izan dira, eta eskerrak eman dizkie bereziki Bagüesek beren jarduera profesionalarekin garatu dituzten funtsak Eresbilen gordailuan uztea erabaki duten emaileei. Iaz, ondoko funts edo material berriak sartu ziren Eresbilen: Tomas Garbizu Funtsaren dohaintza hiru urtean zehar jasoa; Joxean Artzeren soinu grabazioak lagapenean; Kresala Funtsa dohaintzan; Patxi Oliden funtsa dohaintzan; Pedro Aldana funtsa dohaintzan; Juan Etxebeste funtsa dohaintzan; eta Urreta-Zulaika sendiaren dohaintza. Azken horretan, deigarria da ezustean azaldutako Aita Donostiaren irudiarekin lotutako dokumentu multzoa, Bagüesek zehaztu duenez.
Euskal musikagileen sailari 820 partitura berri gehitu dizkio Eresbilek amaitu berri den urtean, “horietatik 60 emakume musikagileek idatziak dira, eta aurretik genituen partiturei gehituta, 35.463 dira Euskal Herriarekin zerikusia duten egile eta musikarien partiturak”.
Lan oparoa aurreko urtean Eresbilek egin duena, eta oparoak izan dira, halaber, jaso dituen bisitak. Guztira, 438.769 lagunek bisitatu zuten iaz Eresbilen webgunea. Jaso dituen eskaerak ere ez dira nolanahikoak izan: 881, gehienak alde handiarekin posta elektronikoz eginak eta telefono bidez, ondoren.
2020ari begira
Aurtengo erronka nagusien artean, Musikasteren 48. ekinaldia, aurten gainera, Jose Luis Ansorenari eskainia. Maiatzaren 15etik 23ra bitartean egingo dute. Ansorenaren omenez egingo duten eguna oso berezia izango dela aurreratu dute, “Errenteriako lau abesbatzek hartuko dute parte”. Bestalde, Jose Maria Iparraguirre, Javier Bello Portueta Miguel Gonzalez Bastida gogoratuko ditu Musikastek aurten, Khantoria, Urval Ensemble eta Xare Laborategia taldeen parte hartzearekin. Amaierako kontzertua “ekintza inportanteenetako bat” izango dela esan du Bagüesek, Anita Bringuet Idiartborde (1861-1943) konpositorearen Gipuzkoa balleta aurkeztuko dute, Euskadiko Orkestra Sinfonikoaren eskutik.
Beste erronka aurten, Euskal Herriko musika funtsen gida osatzen jarraitzea, “gida hori udaberri aldera aurkeztu nahi dugu, dena ondo bidean”.
Amaitzeko informazio praktikoa eman du Eresbilen zuzendariak: aurrerantzean posta elektronikoak eta webguneak .eus domeinua izango dute.
