Babes zabala du U-30eko greba orokorrak Antxon
Grebaren arrazoiak azaltzeko eta Antxon egingo diren ekitaldien berri emateko agerraldia egin dute gaur eguerdian.
Agerraldiaren ondoren talde argazkia atera dute. Hamarnaka antxotarrek bat egin dute gaur eguerdian datorren osteguneko greba orokor deialdiarekin. Askotariko herritarrek agerraldia egin dute Gure Zumardian, grebara zergatik doazen esateko, eta egunaren aurretik zein greba egunean egingo direnak azaltzeko. Pentsiodunak, gazteak, mugimendu feministako kideak, sindikalistak eta komertzianteak izan dira bilkuran, baita norbanakoak ere.
Euskal Herriko Eskubide Sozialen Kartaren deialdiaren bat egiteko “ehunka arrazoi” daudela adierazi dute agerraldian hitza hartu dutenek, eta horien bilduma egin dute jendaurrean. Aldarrikapen zerrenda izan da jendartera zabaldu dutena. Honakoak dira onetsi dituztenak:
- Erretiroa 65 uterekin hartu ahal izatea.
- 1.080 euroko gutxieneko pentsioa.
- Gizon eta emakumeen arteko soldata arrakala eta pentsio arrakala amaitzea.
- Hileko 1.200 euroko gutxieneko soldata.
- Enplegu egonkorra sustatzea eta kontratazioan ematen den iruzurra zigortzea.
- Lanaldia 35 ordura jaistea, soldata murriztu gabe.
- Bereziki emakumeei ezartzen zaizkien lanaldi partzial inposatuak ezabatzea.
- Azpikontratatutako enpleguan subrogaziorako eskubidea bermatzea.
- Kontratazioan sexuaren, jatorriaren, ideologiaren, sexu identitatearen, aniztasun funtzionalaren edo ekonomia jardueraren araberako diskriminaziorik egingo ez dela bermatzea.
- Etxeko lanak eta zaintza lanak duintzea eta gainerako enpleguetan dauden eskubide berberak aitortzea.
- Gazteon emantzipaziorako alokairu sozial eta duinak.
- Benetako lan aukerak eta lan partzial, ordu extra eta abarrekin bukatzea.
Greba orokorraren ardatzak aurkeztuta, ostegunean (eta aurretik) Antxon zer egingo den azaltzeari ekin diote. Baina gai bat nabarmendu dute: “Denok mobilizazioetan parte hartu ahal izateko zaintza lanak konpartitzera dei egiten dugu”.
Honakoak dira hurrengo egunetarako deialdiak Antxon:
- Bihar (igandea), 18:00etan eta Kultur Etxean: Nosotras, mujeres de Euskalduna dokumentalaren proiekzioa.
- Etzi (astelehena), 17:00etan, propaganda banatzeko gelditu dira Kultur Etxean.
- Hilaren 28 eta 29an, 17:30ean, megafonia herritik pasako dute eta eskuorriak emango dituzte.
- Hilak 30, greba orokor deialdiaren eguna: 06:00etan, Oiartzungo Alcampon, informazio piketeak antolatzeko geldialdia; 09:00etan, Antxotik informazio piketeak izango dira; 10:00etan, mobilizazioa; 10:45ean, Donostian egitekoa den manifestaziora joateko oinezko martxaren irteera, zutabe formatuan; 11:25, Irundik datorren auto karabana Antxotik pasako da, Donostiako manifestaziorantz joateko; 16:00etan, kafe autogestionatua; 17:00etan. mobilizazioa.
-
-
