Haserrea bideratzea erabaki dute antxotarrek
Atzo egindako batzarrean, auzo elkartea sortzeko bidea hastea erabaki zuten. Eskalantegi 44ko bizilagunei, babes osoa.
Atzoko batzarreko irudia. Joan den ostiraleko elkarretaratze zaratatsuari jarraipena emateko, batzarra egin zuten antxotarrek atzo arratsean Kultur Etxean. Jendetsua izan zen. Barrutian azken asteetan izan diren lapurretekin kezkatuta daude, baina ikusten dute barrutiak gabezia gehiago dituela. Horiek bideratzeko, haserrea kanalizatzeko, auzo elkarte bat sortzeko proposamena egin zen atzoko bilkuran. Kultur Etxean izan zirenek begi onez ikusi zuten proposamena. Orain, auzo elkartea sortzeko, eta lanean jartzeko boluntarioak behar dituzte. Izena eman nahi dutenek, Mapfreko bulegora (Zumalakarregi kalean dago) joan behar dute.
Horrez gain, Eskalantegi 44 sotoko bizilagunak ere izan ziren batzarrean, joan den ostiraleko elkarretaratzean bezala. Bertakoek berriz ere azaldu zuten bizi duten egoera: uztailetik bertako lehen pisuko etxebizitza bat okupatu egin zuten; okupatu zuten horiek beste etxebizitza batera joan, eta haien ondotik beste kide batzuek jarraitu zuten okupazioarekin; eta salaketak jarrita izan arren, oraindik, gaiaren gaineko ebazpenik ez dute egin epaitegiek. Are gehiago: okupatuta dagoen etxebizitzako, nahiz portaleko bizilagunek mehatxuak salatu dituzte, ez daudela seguru adierazi dute. Argindarra ere “lapurtzen” omen diete. Hala, bilkuran izan zirenek babes osoa azaldu zieten bizilagun horiei, eta era batera edo bestera laguntzeko prest agertu ziren. Bide horretan, beharrezkotzat eman zuten antolatzea, onetsiz auzo elkartearen aukera.
Bien bitartean, mobilizazioekin jarraituko dutela adostu zuten atzoko bilkuran. Beharrezko ikusten dituzte, “Antxok jasaten duen utzikeria salatzeko”, esan zutenez. Barrutiaren egoera hobe dadin bulegoetan eta kalean lan egin behar dela uste dute herritarrek, identifikatuz zeintzuk diren gabeziak. Hala, ostiral honetan (hilak 31) manifestazioa egiteko asmoa dute, 19:00etan Gure Zumardia plazatik hasita. Herriko taberna eta komertzioei dei egin diete manifestazioa bitartean euren negozioak itxi ditzatela, jende gehiago ager dadin mobilizaziora.
Aldi berean, hala nahi dutenek, euren ezinegona balkoietan adierazteko, bertan oihal gorriak jartzeko eskatu dute.
