Hezitzaile Eskolak lau saio eskainiko ditu
Haur eta nerabeekin lanean ari diren begiraleei beren jardunerako baliabideak ematea du helburu Hezitzaile Eskolak, eta horri begira lau saio prestatu ditu udalak.
Martin eta Gartzia gaurko agerraldian. Haur eta nerabeekin lanean ari diren begiraleei beren jardunerako baliabideak ematea du helburu Hezitzaile Eskolak, eta horri begira lau saio prestatu ditu udalak. Gaur eman dute horren berri Maite Gartzia Hezkuntza eta Gazteria zinegotziak eta Bea Martin Gazteria dinamizatzaileak. Ikastaro guztiak larunbatarekin egingo dituzte, bi otsailean eta beste bi martxoan, euskaraz izango dira denak eta doakoak. Aurtengo berezitasuna, alderdi praktikoari emango dioten garrantzia izango dela zehaztu du Martinek.
Errenteria-Oreretan garrantzi handikoak diren haur eta nerabeen aisialdian eta hezkuntza prozesuan oinarrizko diren hainbat gairen inguruko bi saio monografiko antolatu ditu udalak; horien atzean, Hik Hasi egitasmoa.
Otsailaren 8an izango da lehen saioa: Kultur aniztasuna eta generoa gure herrietan. Apur bat harago gaia landuko dute. Gartziak nabarmendu duenez, azken hogei urtean kultur aniztasuna nabarmen areagotu da euskal gizartean eta hezkuntza sisteman, “aniztasun horren kudeaketa da une honetan arreta merezi duen alderdi bat, ekitateari, gizarte kohesioari eta elkarbizitzari begira”.
Aniztasuna generoaren gaiarekin gurutzatzen denean, zein egoera, galdera, zalantza agertzen dira? Zein dira gizartearen indar guneak eta erronkak? Galdera horien erantzuna bilatzen saiatuko dira otsailaren 29an Kultur aniztasuna eta generoa gure herrietan. Gogoeta batzuk partekatzen saioari esker. Amelia Barquinek gidatuko du saioa.
Martxoaren 21ean eta 28an izango dira beste bi saioak, Arremanitz kooperatibak gidatuta lehenengoa eta Esther Uriak gidatuta bigarrena. Aniztasuna eta parekidetasunaz arituko dira lehen saioan, eta antzerkia baliatuko dute berdintasuna eta aniztasuna lantzeko bigarrenean. Lau saioak 10:00etatik 13:00etara izango dira Merkatuzarren. Plazak mugatuak dira eta ezinbestekoa dute parte hartu nahi dutenek izena ematea; horretarako, posta elektronikora idatzi edota 943 449 606 telefono zenbakira dei dezakete. Taldea osatzeko hamar laguneko gutxieneko partaide kopurua izango da beharrezkoa.
