Ludoteketan izena emateko epea zabalik otsaila osoan zehar
Otsailaren 1etik 29ra arte eman ahalko da izena Pasaiako udal ludoteketan. Bigarren deialdi hau, dagoeneko ludoteketako bazkide ez diren haurrei zuzenduta dago.
Otsailaren 1etik 29ra arte eman ahalko da izena Pasaiako udal ludoteketan. Antxo, Donibane eta Trintxerpe-San Pedroko udal ludotekek ikasturtearen bigarren zatirako izen emate epea zabalduko dute otsailean. Dagoeneko bazkide ez diren 4 eta 12 urte bitarteko haurrek otsailaren 1etik 29ra arte eman ahalko dute izena. Ludotekek eskainitako zerbitzua harrera ezin hobea du pasaitar gazteenen artean, 260 baitira arratsaldero ludoteketara doazenak.
Udal ludotekak, Pasaiako Udalaren Haur, Nerabe, eta Gazteen Sustapen Sailaren menpekoak dira eta Kantauri Ludiko Elkarteak kudeatzen ditu bertan egiten diren ekintzak. Bertan jolaserako toki egoki bat bermatzeaz gain, hainbat balore jasotzen dituzte haurrek; sormena, irudimena, jokoekin arduratsu izatearen garrantzia. Gainera, ekintza guztiak euskaraz egiten direnez, haurrek eskolan ikasitakoa aberasteko eta gizarteratzeko aukera izango dute.
Udalaren, Haur, Nerabe eta Gazteen Sustapen Sailak oroitarazi du, Unicefek onartutako Haurren Eskubideei Buruzko Hitzarmenean aitortutako oinarrizko eskubideen artean, jolasa dagoela. Ludoteketan eskubide horiek bermatzeko jolas ugari eskainiko dituzte, hala nola, jolas askeak, mahai-jolasak, lantegiak, txotxongiloak etab.
Hiru zentroak ekainera arte izango dira zabalik, astelehenetik ostiralera, 17:00etatik 20:00ak arte eta larunbatetan 11:00etatik 13:00etara. Izena emanda izan arren, haurren ez dute zertan egunero joan behar. Ikasturte erdirako kuota 28’99 eurotan ezarri du udalak. Antxoko ludotekari dagokionez, astearte eta osteguneko txandetarako bakarrik zabalduko da, ez baitago nahikoa espazio haur guztiak hartzeko beste egunetan.
Matrikulak zuzenean egin beharko dira, hau da, ludoteketan bertan. Nahi duenak gainera, hitzordua eskatu dezake ludotekak lehen eskutik ezagutzeko. Pasaiako Udal Ludotekekin harremanetan jartzeko informazioa, hemen.
