[Galeria] Pasaiako kirola eta jarduera fisikoa, gala batean
Donibaneko Juanba Berasategi aretoan egindako ekitaldian, herriko kirol baliabideen eta kirolari nabarmenen berri eman zen.
Galaren bukaerako talde argazkia. Pasaiako Kirol Galaren hirugarren ekitaldia egin zuten asteazkenean Donibaneko Juanba Berasategi aretoan. Bete egin zen. Luisma Laboa kazetariak gidatutako saioan, 2019an Pasaiako kirol elkarte eta norbanakoek lortutako lorpenak aitortu egin zituzten. Aldi berean, udalak herritarren eskura kirol alorrean deituen zerbitzuak gogorarazteko tartea izan zen. Beste hainbat aipamen berezi ere egin zituzten.
Hasteko, hainbat aurkezpen eta azalpen egin zituzten ekitaldian. Hala, Pasaiako Badia Aktiboa estrategiaren aurkezpena eta horren barruan dauden programen azalpena eman zen: Jarduera Fisikoa eta Kirol Orientazio Zerbitzuaren ibilbidea, nahiz Etxean Bizi eta Heldufit egitasmoen aurkezpena, besteak beste. Tipi-Tapa ekintzek aitortza izan zuten, eta bertako partaideei aitortza egin zitzaien. Gainera, PKB Pasaia Badia Kirol Klubak hasitako bidea azaldu zuten. Bizikleta mugikortasunaren gainean egindakoak ere azalduko zituzten: BiziBadia mailegu sistema, eta bizikletan ikasteko ikastaroaren informazioa.
Horren ondoren, hainbat kirolariri errekonozimendua egin zitzaien.
- Pasaia Kayak taldearen errepasoa egin, eta Ion Carballori aitortza egin zitzaion.
- Pasai Donibane-Koxtape arraun taldeko Haurren Mailako taldeari aitortza egin zitzaion, Gipuzkoa, Euskadi eta Espainiako txapeldun izateagatik.
- Donibane Eskubaloia kirol elkarteko Senior eta Kadete mailetako taldeei aitortza egin zitzaien, Gipuzkoako Kopa irabazteagatik.
- Antxotarrak Lasterkari Taldeko kide Edurne Jauregiri eta Ana Cruz Oyarzabali aitortza egin zitzaien, Kirolprobak Ligan irabazle izateagatik.
- Pasaiako Trintxer Hockey Taldeari aitortza egin zitzaion, 50. urteurrenagatik.
- Pasaitarrak izanik, udalerrikoak ez diren elkarteetan aritzen diren kirolari nabarmenduei ere egin zitzaien aitortza. Hala, Irene Paredes Atletico San Sebastian taldeko softbol jokalariaren bideari aitortza egin zitzaion, baita Airam Ramirez antxotarrari ere: kulturismo naturalean Espainiako Txapeldun izan da, eta Munduko Txapelketan parte hartu zuen.
Ekitaldia bukatzeko, Pasaiko alkate Izaskun Gomezek hizketaldia eman zuen. Nabarmendu zituen Pasaiako kirol elkarte eta norbanakoen zeregina eta herriari egiten dioten ekarpena, eta eredu direla herritarrentzat. Aldi berean, Oarsoaldeko Eskola Kirola egitasmoaren jardunari gorazarre egin zion.
Jarraian, halako hainbat irudi.
