Izaskun Gomez: "Segurtasuna lehentasuna da"
Pasaiako Udalak, segurtasuna bermatzeko eta delituak saihesteko plana prestatu du. Planak Antxon eman diren lapurretei erantzun bat emateko sortu dela dio bozeramaileen batzarrak.
Artxibo irudia. Gomez alkateak segurtasuna lehentasuna dela dio. Segurtasun izan dute gaur hizpide Pasaiako Udalaren bozeramaileen batzarrean. Jakinarazi berri dutenez, udalak segurtasuna bermatzeko eta delituak saihesteko plana sortu du, azken hilabeteetan Pasaian eta bereziki Antxon gertatutako lapurretei erantzun bat emateko. Helburu nagusia, pasaitarraren segurtasuna ziurtatzea dela esan du Izaskun Gomez, Pasaiako alkateak, “segurtasuna lehentasuna da guretzat, beharrezkoak diren baliabide guztiak jarriko ditugu delinkuentziari aurre egiteko”.
Legealdi honetan segurtasuna lehentasun nagusien artean kokatuko du udalak, herritarrak seguru sentitu ezean, ez baitago “ez eskubide ezta ongizaterik ere” Gomezen esanetan. Azken gertakari gehienak Antxon eman diren arren, aferak herri osoari eragiten dio “denon batasuna beharrezkoa da gaizkileei mezu zuzen bat bidaltzeko; Pasaian ez!” adierazi du alkateak. Udalaren planak, talde politiko guztien eta hiritarren ekarpenak jasoko ditu.
Bozeramaileen batzarrak aztertutako neurrien artean, honako hauek nabarmendu dituzte.
- Poliziaren presentzia sendotzea; alde batetik Ertzaintzarekin eta Donostiako Udalarekin plan bateratua eginez eta bestetik oinezko patruila eta kaleko arropekin jantzitako polizia gehiago.
- Bideokamerak jarriko dira gune gatazkatsuetan, delitugileak identifikatzeko.
- Argiztatze gehiago eta hobea, gune ilunik egon ez dadin.
- Ispiluak jarriko dira, ezkutatzeko lekuak agerian uzteko.
- Donostiako Udalarekin lankidetza estuagoa, bereziki partekatuak diren zonaldeetan.
Otsailaren 3an (astelehena) Izaskun Gomez Donostiako alkate Eneko Goiarekin bilduko da, gaiaren berri emateko eta aferari aurre egingo dion hitzarmena proposatzeko.
