Goiatz Labandibarrek eta Aitor Kaltzakortak Pasaia Hiria saria jasoko dute hilaren 13an
Kaltzakortaren 'Euria zara-zara' eta Labandibarren 'Interpretazioak G minorrean' olerkiengatik jasoko dute saria bi idazleek.
Goiatz Labandibar oiartzuarrak jasoko du Pasaia Hiria lehiaketaren bigarren saria. Pasaia Hiria-Xabier Portugal poesia lehiaketako sariak jasoko dituzte Aitor Kaltzakorta eta Goiatz Labandibar idazleek, hilaren 13an (osteguna), Trintxerpeko liburutegian 19:00etan. Euria Zara-Zara poema sorta bikainagatik eramango du Kaltzakortak sari nagusia. Bigarren saria ordea, oarsoar batek eramango du, Goiatz Labandibar Arbelaitz Oiartzuarrak, Interpretazioak G minorrean lanagatik.
Irabazleen izenak, ez dira albiste, 2019ko urrian ezagutzera eman baitziren irabazleak. Sariak ordea, otsailaren 13an banatuko dira. Olerkigintzarekin bat egiteko aukera polita izango dute herritarrek, saridunek haien lanen pasarteak irakurriko dituzte eta.
Pasaia Hiria-Altamira Puente, hau da, gaztelaniazko saileko irabazleen sariak ere 13an banatuko dira. Rosa Maria Rubio Getxoztarrak eta Badajozko Francisco Serranok jasoko dute saria. Rubioren Quien anda en la playa eta Serranoren Tu otro nombre dira saritutako lanak. Elena Roman Jesus Maria Corman eta Felix Marañak osatu dute epaimahaia.
Pasaiako Udalak emandako sari ekonomikoaz gain, bi liburu argitaratuko dituzte saritutako poesia obrekin, bata euskaraz eta bestea gaztelaniaz. Pasaia Hiria poesia saria 1980. urtean sortu zen Antxon, Altamira Puente liburuzainaren gidaritzapean. Ordutik, urtero eman dituzte poesia sariak, Pasaiako Udala sustatzaile nagusia izan delarik. Irakasle, idazle, zinegotzi eta alkate izandako Xabier Portugal izan zuen laguntzaile Puentek urte askoz. Sustatzaile izateaz gain, parte hartzailea ere izan zen hainbatetan Portugal.
