[Bideoa eta Galeria] Kalean jarraituko dute bizitza duinen alde
Pozik, U-30eko greba orokorraren gaineko balorazio ezin hobea eginda, indarberrituta itzuli ere Gabonetako etenaldiaren ostean.
Duintasuna berriro atera da kalera. Kalera atera dira, beste behin ere, jubilatu eta pentsiodunak gaur. Hileko lehen astelehena izanik, eta beren eskaerak bete gabe jarraitzen dutenez, kalea hartu du berriro pentsio duinen aldeko aldarriak. Pozik, U-30eko greba orokorraren gaineko balorazio ezin hobea eginda, indarberrituta itzuli ere Gabonetako etenaldiaren ostean.
11:00etan elkartu dira Herriko Plazan eta greba orokorraren gaineko balorazioa eginez hasi dute gaurko protesta, eta herria zorionduz pasa den ostegunean “eman zuen erantzun eredugarriagatik”. Hori berresteko datu bat eman du Duintasuna jubilatu eta pentsiodunen elkarteak, arratsaldeko Errenteria-Oreretako manifestaziora 4.000 lagunetik gora batu ziren. Aurrerantzean bidea zein den argi dute, “borrokan segitzea orain arte bezalaxe, irabaziko dugulako”, eta horretara deitu dituzte herritarrak. Osteguneko mobilizazio orokorrarekin urrats handia egin dutela sinistuta azaldu da gaur kalera Duintasuna, eta gogor salatu agintariek “entzungor jarraitzen dutela” eta “mespretxuz” erantzun diotela grebari, “harroputz eta handi ustez”: “Alde batetik Eusko Jaurlaritza, bere polizia, telebista, multinazionalak, bankuak, Iberdrola, herriarentzat hondamendia den liga hori, eta herria, gehiengo soziala, gehiengo sindikala, gazte, feminista eta ikasleak. Intoxikazio kanpainak eragina izan du, baina gehiengo soziala indarrez atera da maratoi borroka honetara. Urduri daude, porrota beraiena delako, ez direlako gauza pentsiodunen eta gizarte honen arazoak konpontzeko; hori bai porrota eta iruzurra”.
Osteguneko greba orokorrak, milaka lagunen kezka piztu zuela esan dute, “denek onartu dute egindako eskaerak justuak eta arrazoizkoak direla, baina ez dakigu zein erantzun eman duten, ez dagoelako erantzunik, milaka eta milaka lagunek egin ditugun eskaera horiei”. Pentsioei ezarritako %0,9ko igoerak ez dituela pentsiodunen “ilusioak eta beharrak” asetzen salatu dute gainera, “KPIa %1,2 igo da Araba, Bizkai eta Gipuzkoan, pentsioetan egindako igoeraren gainetik”.
Mikrofonoa zabaldu dute, eta bertan parte hartzen ari zen lagun batek hartu du hitza. Ostegunekoa, historikoa izan zela esan du, eta pentsiodunek sindikatuekin ez dutela nahastu behar esaten dutenei kontra egin die, “greba batzordeetan hartu dugunok badakigu zein garrantzitsua izan den elkarlanean aritzea, gazteak, feministak, langileak, prekarioak, sindikatuak eta pentsiodunak. Elkarlan hori da bidea. Lehnengoz, eskaera ezberdinak batu dira greba batean, eta horren bueltan sektore ezberdinak biltzeko gaitasuna izan dugu”.
Lehen bataila irabazita dutela esan dute, baina jakitun dira bide luzea dutela oraindik ere aurretik, eta borroka bidea dela aukera bakarra, “borrokan jarraituko dugu gure helburuak lortu arte, bizitza duina, gutxieneko pentsioak 1.080 eurokoak, eta soldatak gutxienez 1.200 eurokoak erdietsi arte. Atzera pausurik ezin dugu eman, borrokan jarraitu behar dugu, irabaziko dugu eta”.
