Algeposa zamalan enpresa, Pasaia Itsas Festibalaren kolaboratzaile berria
Portuaren inguruko enpresek festibalarekin bat egitea da funtsezko helburutzat jo dute antolatzaileek.
Algeposako ordezkariek Albaolan eman dute erabakiaren berri gaur goizean. 2020ko Pasaia Itsas Festibalak babesle berria du. Kolaborazio hitzarmena sinatu dute itsas festibalak eta Algeposa enpresak. Gaur goizean eman dute erabakiaren berri antolatzaileek eta enpresak Albaola Itsas Kultur Faktorian egindako agerraldian. Bertan izan dira Algeposaren aldetik, Maria Luisa Guibert CEOa, Carmen Echeverria project managerra eta Patricio Echeverria Alcorta. Haiekin batera, Izaskun Gomez Pasaiako alkatea eta Xabier Agote festibaleko eta Albaolako burua izan dira ekitaldian.
Algeposak Pasaiako eta inguruetako ekonomian duen garrantzia nabarmendu dute. 1981az geroztik egiten ditu zamalanak Pasaiako Portuan Algeposak, operadore logistiko gisa. Trenbideen arloan ere operadore logistiko dira eta Pasaiaz gain, Iberiar penintsulako portu garrantzitsuenetan ere egiten dute lan.
Pasaia Itsas Festibalaren enpresa kolaboratzaile izanda, Pasaiaren ondarea ezagutzera eman nahi du Algeposak, portuaren hobekuntza estrategikoan laguntzeko. Era berean, Pasaiako Udalak urrats garrantzitsutzat jo du enpresaren erabakia, funtsezkoa baita portuko enpresek festibalarekin bat egitea.
