Ez da aspertzeko aukerarik izango Trintxerpeko inauteritan
Asteburu osoan zehar ospatuko dira barrutian dagoeneko klasiko eta ospetsu bihurtu diren inauteriak. Konpartsen aurkezpena frontoian egingo da aurten.
Iazko inauterien artxibo irudia. Urtero legez, Euskadi etorbidea dantzaleku bihurtuko dute Trintxerpeko konpartsek. Herri gehienetan ajeari aurre egiten ari diren bitartean, Trintxerpeko herritarrak asteburu honetan dena emateko prestatzen hasi dira. Akabo itxaronaldia. Bihar hasiko dira Pasaiako barruti gazteenaren inauteriak. Hiru egunez mozorroek hartuko dute Trintxerpe eta bertako kale nagusia, Euskadi etorbidea, konpartsa koloretsuen dantzaleku izango da. Gustuko dituzte inauteriak trintxerpetarrek eta jai kuttunen artean dutela frogatuko dute berriz ere. Aurtengo gai nagusia, marrazki bizidunak izango dira.
Karmengo Ama ikastetxeak emango dio hasiera inauteriei. 11:15ean kalera konpartsa kalera aterako dute eta herriko kalea nagusietan ibiliko dira. 21:00etan egingo da ohiko konpartsen aurkezpena; aldaketa esanguratsuena ekitaldiaren kokaleku aldaketa da; frontoian egin dute, izan ere, Portu Agintaritzak ez du baimenik eman Ziriza Etxean egiteko. 23:00etan aurtengo berritasunetako bat, kontzertua izango da Azkueneko biribilgunean DJ Eriken eskutik.Trintxerpeko korkoiburuek, desfilera batzeko deia egin diete herriko kuadrillei.
Larunbata izango da inauterien egun handia. 17:00etan konpartsa eta kuadrillen desfilea egingo da. Etxeko Boveda, Thamessis, Txassis, Fama Show Time eta Gurea herritarren aurren dantzatzen ibiliko dira, San Pedroko Esnabide kaletik, Euskadi etorbideko bukaeraraino. 21:30ean bestalde, gazte afaria izango da Trintxer elkartean, Korkoiburuek antolatuta.
Igandea izango da jaien azken eguna. 17:00etan konpartsen desfilea egingo dute berriz ere, ibilbide berdinean. Inauterien amaiera, 19:30ean izango da; orduan egingo da Bakailaoaren ehorzketa. Konpartsez haratago, herriko kuadrillen eta bestelako taldeen ekarpenak garrantzitsuak izango direla adierazi dute inauterien antolatzaileek.
Egitaraua.
Otsailak 28, ostirala
- 11:15: Karmengo Amako konpartsaren irteera. Ibilbidea: Andonaegi, Arrandegi, Euskadi etorbidea eta Azkuene.
- 21:00: Konpartsen aurkezpena Frontoian. Segurtasun arrazoiak direla medio plaza mugatuak izango dira.
- 23:00: DJ Erik, Azkueneko biribilgunean.
Otsailak 29, larunbata
- 12:00: Erraldoiak eta buruhandiak herriko kaleetan zehar.
- 17:00: Konpartsa eta Koadrillen desfilea. Ibilbidea: Esnabide 26.tik Euskadi etorbidearen amaierara arte.
- 19:00: Mozorro-poteo ibiltaria DJ Txitarekin.
- 21:00: Haur eta gazteen afaria Karmengo Amako gimnasioan.
- 21:30: Gazte afaria Trintxer elkartean, Trintxerpeko Korkoiburuek antolatuta.
- 00:00: Kitadelpare txaranga. Ibilibidea: Trintxer elkartea, Gudarien Plaza eta Serafin Esnaola plaza.
Martxoak 1, igandea
- 17:00: Konpartsen desfilea larunbateko ibilbide beretik.
- 19:30: Bakailaoaren ehorzketa.
