Orereta Ikastolaren Inude eta Artzainak, igandean
Inude eta Artzainak 12:00etan aterako dira Koldo Mitxelena plazatik. Orereta Ikastolatik adierazi dute 350 partaidekoa izango dela konpartsa.
Iazko desfilearen irudi bat. Igandean aterako dira, hogeita hirugarrenez, Orereta Ikastolako Inude eta Artzainak. 12:00etan hasiko dira inauteri osteko igandeko goiza alaitzeko zereginean, Koldo Mitxelena plazatik abiatuta. 350 pertsonako konpartsa handia izango da.
Ikastolako ikasle eta gurasoez gain, herriko hainbat eragilek ere parte hartuko dute desfilean. Horien artean daude Ereintza elkarteko txistulari taldea, Iraultza dantza taldea, Errenteria Musikaleko Musika Banda, dultzaineroak, trikitilariak, Amulleta elkarteko danbor kofradia, dantzarien kuadrilla baserritarrez jantzita eta erromeria giroan, Jose Mari auto klasikoak, eta beste hainbat gazte nahiz heldu garai bateko jantziekin. “Guztiei eskerrik beroena hemendik. Horiei guztiei esker, 350 pertsonak osatutako konpartsa koloretsu eta alaia ibiliko da aurtengoan ere herriko kaleetan barrena”, esan dute Orereta Ikastolatik.
Esana dago 12:00etan hasiko dela desfilea, Koldo Mitxelena plazatik. Ondorengo ibilbidea honakoa da: Maria Lezo kalea, Xenpelar kalea, Alfonso XI kalea, Pelotarien kalea, Kapitain Enea, Biteri Txiki, Gamon Zumardia (fandangoa eta arin-arina dantzatuko dituzte), Herriko Plaza, Foruen Plaza, Xenpelar kalea, Morrongilleta kalea eta Koldo Mitxelena plaza. Bertan egingo dute ekitaldi nagusia.
1979an eta 1980an Ereintza elkarteak egindako ahaleginari segida emateko asmoz, 1998an hasi zen Orereta Ikastola Inude eta Artzainen konpartsaren desfilea antolatzen.
