Ikasgela, motxilan etxera
Honakoa ere ez da erronka makala, egoera larriak molde berriak erabiltzera derrigortu du irakaskuntza. Gaur izan dute eskola ez presentzial horiek lehenengo eguna.
DBHko ikasle bat, etxetik lanean. Pasa den ostiraletik eskola presentzialak bertan behera gelditu eta etxera bidali dituzte ikasle guztiak. Hilaren 27ra arte hartutako neurria da, koronabirusa ez zabaltzeko, pandemia hedatzea prebenitzeko hartutako neurrietako bat. Argi utzi dute hasieratik Hezkuntza Sailetik zein ikastetxeetatik ere honakoa ez dela oporraldia, eta ikasleek prestaketa akademikoa etxean jarraitu behar dutela irakasleek lagunduta.
Ez da erronka makala, egoera larriak molde berriak erabiltzera derrigortu du irakaskuntza. Gaur izan dute eskola ez presentzial horiek lehenengo eguna, eta ikastetxe bakoitza ahalik eta egokien moldatzen saiatu da osasun krisialdiak ikasleen prestaketa ez dezan eten. Abilezia plus bat eskatu die egoerak irakasleei, baina baita ikasleei ere.
Imanol Sorondo Lezo Institutuko zuzendariak, lehenengo egunarekin kezka bazuten ere, ondo moldatzen ari direla esan dio HITZAri, “ostiralean mezu elektroniko bidez jakinarazi genien ikasle eta familiei etxeko lanak hainbat plataforma erabilita egingo genituela gaurtik, eta erantzuna ona izan da oso”. 223 ikasle ari dira bertan. Lezo Institutuaren kasuan, Classroom, Moodle eta gmail erabiltzen ari dira ikasleei lanak bideratzeko. Eskolak ez dira presentzialak, baina ordutegi berean jarri dituzte ordenagailu aurrean ikasleak Lezo Institutuaren kasuan, “08:00etan hasi dira, ohiko ordutegian, eta materiak ere ohiko ordutegian mantendu dira. Irakasle bakoitzak bere eskola orduan jarri dizkio zereginak ikasleari, eta horiek aurkezteko epe bat. Ikasleak oso ondo erantzuten ari dira. 14:10ean bukatuko dute, egunero egin ohi duten moduan”.
Ikasle bakoitzak gainera fitxatu egin du gaur saio bakoitzean, telematikoki izan bada ere. Garrantzitsua dela ulertzea lanean jarraitu behar dutela, egoera berezi batean daudela, baina prestaketa ezin dutela eten esan du Sorondok.
Jakin badakite ez dutela ikasle guztiek etxetik bitarteko horiekin aritzeko aukera, eta horretarako ere aurkitu dute irtenbide bat: “Ikasle guztiek ez dute ordenagailua edota wifi konexioa etxean, edota anai-arreba gehiago dira eta denek behar dute… gurasoetako batzuei ere egokitu zaie etxetik lan egitea. Horiek ikastetxera etorri eta ariketak papereko euskarrian jasotzeko aukera dute”. Hori bai, azken hori modu ordenatuan egiten ari direla zehaztu du, “telefonoz deitu eta hitzordua jartzen dugu banaka etor daitezen”. Institutura joan behar duten irakasleekin ere horrela jarduten ari dira. Une honetan zuzendaritzako bi kide eta beste langile bat ari dira Lezo Institutuan.
Bihartik, gainera, telefonoz hasiko dira harremanetan jartzen familiekin behin-behineko lanketa modu berriaren gainean dauden arazo eta zalantzak jasotzeko, eta irtenbide egokiak emateko. Hezkuntza komunitate osoak egoera berria lasaitasunez hartu duela nabarmendu du azkenik Sorondok, “momentuz ondo bidean doa, ikusi beharko datozen egunetan”.
Txostenak eta plangintzak lana errazteko
Errenteria-Oreretako Orereta Ikastolan ere ostiralean bidali zieten mezua ikasle eta familiei etxetik lanean aritzeko gakoak azaltzeko, Leire Agirrezabala Orereta Ikastolako komunikazio arduradunak azaldu duen bezala: “Etxean egin behar dituzten lanak azaldu dizkiegu ikasleei beharren arabera: Lehen Hezkuntzako ikasleei txosten bat eta plangintza bat lagungarri izateko eman dizkiegu, 5. eta 6. mailako ikasleak, berriz, digitalean arituko dira, baita DBHko ikasleak ere”. Ikasleak irakasleekin harremanetan jartzeko moduak zehazten ari direla esan du, eta ordutegia apur bat murriztu badute ere, 08:30etik 13:00ak arte arituko dira, ikasketa prozesua ez etetearen garrantzia nabarmendu du.
aparteko egoeraren aurrean aktibatutako neurriak ikasleek eta familiek oso ondo hartu dituztela esan du Agirrezabalak, “erantzuna oso egokia izan da, aparteko eegoera da, eta horrela hartu dute”. Orereta Ikastolan 1.500 ikasle ari dira guztira, Haur Hezkuntzatik hasi eta batxilergoraino.
Irizpide bateratuen faltagatik, kexu
Arantxa Igartua Koldo Mitxelena ikastetxeko zuzendaria da. Beste bi ikastetxeen kasuan bezala, etxetik ari dira lanean irakasleak eta zuzendaritzako kide bat, idazkariak, eta atezaina ari dira bertatik lanean. 500 ikasle ari dira bertan, DBHn zein Batxilergoan, eta horietatik sei gela iraunkorrean. Moodle eta gmail erabiltzen ari dira ikasleei eskolako lanak helarazteko.
Kexu da Igartua; Hezkuntza Sailetik irizpide bateratuak beharrezkoak direla uste du, “eta halakorik ez dugu jaso, zuzendaritza bakoitzari malgutasuna eman diote erabakiak hartzeko ikasleen lanketari dagokionean, eta nire ustez, irizpide komunak behar dira ikastetxe guztiek berdin jarduteko ikasleekin; erabakiak zuzendaritza taldeen esku utzi dituzte. Ikuskariekin harremanetan gaude, baina beraiek ere gure antzera ez dute irizpide jakin bat”.
Eskola ordutegia ahal den neurrian mantentzeko ahalegina egingo dute, baina lan egiteko modua berria denez, ez dakiela zein emaitza izango dituen esan du, eta horrekin ere kezka azaldu du, “ikasle guztiek ez dituzte etxean modu honetan jarduteko beharrezko bitartekoak, eta haiekin telefonoz ari dira tutoreak, motxilak lepo joan zirelako ostegunean etxera ikasle guztiak, liburu guztiak hartuta, lanean segi ahal izateko”.
