Koronabirusari aurre egiteko elkartasun sarea sortuko dute Antxon
Alarma egoerak eta murrizketek iraun bitartean, egoera zaurgarrian diren herritarrei laguntza emateko boluntarioak eskatu dituzte.
Sareak arreta berezia emango die egoera zaurgarrian diren pertsonen zaintza lanei. Irudia: Harremantxo. COVID-19 gaitzaren hedatzea eteteko ezarritako mugikortasun murrizketek, zailtasun ugari eragingo dizkiete herritarrei, bereziki egoera zaurgarrian diren horiei. Adineko pertsonei edota mugikortasun arazoak dituzten pertsonei adibidez. Zailtasunei irtenbide herrikoi eta komunitario bat emateko asmoz, elkartasun sare boluntarioa sortzeko deia egin dute Antxoko herritarrek.
Egoerak duen larritasunari jarraiki, herritarren bizitzak erdigunean jarri nahi dituzte, sor daitezkeen arazoei erantzun kolektibo bat emateko. Nahi eta ahal duenak, sarearekin bat egin dezake, posta elektronikoz. Zaintza lanei arreta berezia emango die sareak.
Horrez gain, sortzekoa den sareak, izurriteak iraun bitartean ohitura zintzoak izateko gomendioa luzatu die antxotarrei. Herriko dendetan erostearen garrantzia nabarmendu dute eta erosketa horiek modu arduratsuan egitea, gehiegi erosi gabe. Egungo egoerak, herritarren egunerokotasuna sakonki aldatu du, eta askok ardura gehiago dituzte. Hori dela eta, zaintza lan horiek partekatzea denen ardura dela oroitarazi dute saretik.
