Zuzendaritzak baliabiderik ez diela eman salatu dute Euskotreneko geltokietako langileek
Hainbat eskaera bideratu dizkiote Euskotrenen zuzendaritzari, "idatziz zein telefonoz" baina oraindik ez dutela geltokietako langileentzako babeserako ezer jaso salatu dute, "horren aurrean, langileak ari gara neurriak hartzen. Non dago enpresaren ardura?".
Geltokietako langile batek lan lekura etxetik eramandako garbiketa produktuak. Koronabirusaren krisi larriaren aurrean enpresek bermatu beharko lukete langileen segurtasuna eta osasuna, are gehiago kontuan hartuta gaixotasuna ez zabaltzeko egiten ari den esfortzua, herritarrei eskatu zaien konfinamendua kasu. Azken horiek, herritarrak, arduraz ari dira jokatzen, eskatutako neurriak betetzen, hainbat enpresetan baina egoera erabat ilogikoak ematen ari dira langileen babeserako neurriak ez dituztelako hartu, edota hartutakoak ez direlako nahikoak. Horren harira, Euskotreneko geltokiko langileek salaketa egin zuten atzo sare sozialen bidez; beren kasuan, ez dituzte ezta desinfekziorako produktuak jaso ere, eta langileak ari dira lantokira eramaten etxetik. Egoera hori orokorra dela esan dute langileak dauden geltoki guztietan, eta Oarso Bidasoko herrien artean, Irunen, Errenteria-Oreretako geltoki nagusian eta Galtzarabordakoan, eta Pasaiako geltokian ari dira baldintza horietan lan egiten.
Geltokietan, ordenagailua, telefonoa, teklatua eta bestelako elementuak konpartitzen dituzte langileek eta txanda aldaketetan beraiek ari dira elementu komun horiek garbitzen etxetik eramandako produktuekin. Hortik harago, eta Euskotrenek bezeroek dirutan ordaintzea onartzen ez duela esan badu ere, azken hori gezurtatu egin dute geltokietako langileek; gaur gaurkoz, oraindik ere, diruz ordaintzen dute bezero batzuek debekurik ez delako egin, eta hortaz, derrigortuta daude langileak ordainketa modu hori onartzera, “saiatzen gara bideratzen makinetara, baina derrigortzen ez duten bitartean, bezeroek ahal dute diruz ordaindu”.
Hainbat eskaera bideratu dizkiote Euskotrenen zuzendaritzari, “idatziz zein telefonoz” baina oraindik ez dutela geltokietako langileentzako babeserako ezer jaso salatu dute, “horren aurrean, langileak ari gara neurriak hartzen. Non dago enpresaren ardura?”.
Langile horiek BarrutiKanpora kontua sortu dute Twitterren lanean zein baldintzetan ari diren zabaltzeko.
