Arrain gutxi eta merkeegi saltzen ari da arrantzaleen kofradian
Hainbat kasutan arrainen prezioa %50 jaitsi dela jakinarazi du arrantzaleen kofradiak. Baxurako ontziek bitartean, berdelaren kanpainak berean jarraitzen du.
Irudian, berdelak. Kanpainak berean jarraitzen du baxurako ontzientzat. Egoera zaila bizitzen ari dira une Pasaiako portuko arrantzaleak. Koronabirusaren hedatzea eteteko ezarritako murrizketek, kalte egin diote sektoreari. Elikagaiak erostea baimenduta badago ere, errealitatea da, merkatua falta zaiela, “jatetxeak itxita daude, hotelak ere eta jende askoren lantokietan Aldi Baterako Lan Erregulazio Espedienteak egin dituzte. Nola erosiko dute ba arrain freskoa zailtasun ekonomikoak dituzten pertsonek?” adierazi du Nerea Tejedor Kepa Deuna San Pedroko Arrantzaleen Kofradiako idazkariak.
Sinplea da, arrain kopuru bera sartzen bada eta eskariak behera egiten badu, prezioek ere behera egingo dute nabarmen. Tejedorrek eredu argigarri bat eman du, “Eskozia iparraldean arrantzatzen den pintxoko legatzaren prezioa, %50 jaitsi da aste batetik bestera. Bolantako ontziekin beherakada nabarmenagoa izan da”. Egoerarik txarrenean daude berez, gutxi saltzen ari dira eta merkeegi.
Arrantzontzi txikiek bitartean, berdela eta beste espezie batzuk arrantzatzen jarraitu behar dute, nahitaez, “lehen sektorea garelako lanean jarraitu behar dugula dio Eusko Jaurlaritzak, jardun ekonomikoak jarraitu behar duela. Baina mesedegarria da? Azken finean arrantzaleak dirua galtzen ari dira” azaldu du Tejedorrek. Epe ertainera kalte ekonomikoak larriak izan daitezkeelakoan, jarduna guztiz etetea pentsatzen ari dira ontziak.
Kezkatuta daude, datozen ondorio ekonomikoengatik, baina batez ere, osasunarengatik. Itsasontzietan prebentzio jarraibideak “ahal diren neurrian” betetzen direla dio kofradiako idazkariak. Lurrean zein itsasoan, prebentziorako baliabide gutxi dituztela esan du Tejedorrek, ” badakigu egoerak denoi egin digula gainezka eta ez dela inoren errua, baina lonjan bertan beharrak ditugu, sarreran maskarak banatzea, tenperatura neurtzea… gutxieneko batzuk baino ez”. Prestige itsasontziaren hondoratzea gogora ekarriz orduko “koordinazio eta babesa” nabarmendu du idazkariak.
Antxoa apirilerako
Kantauriko harribitxia, antxoa, dagoeneko arrantzatu daiteke, baina kanpaina apirilera atzeratzea erabaki dute. Kalitatezko arraina da antxoa, baina delikatua. Hortaz, ez du zentzurik hura arrantzatzea, gutxi saltzeko, errentagarritasunik gabe eta soberan gelditzen dena botatzeko.
Hobe da kala ez ustiatzea eta biomasari atseden ematea. Gauzak horrela, ez da Antxoarik sartuko Pasaiako portuan, gutxienez apirilaren 11 edo 12ra arte.
