Hondakinen trataera koronabirus garaian
Etxeko eta merkataritzako hondakinen tratamenduaren gaineko hainbat jarraibide eman ditu udalak, herritarrek egoki jokatzen jarrai dezaten
koronabirusa,hondakinak,arduraz Etxeko eta merkataritzako hondakinen tratamenduaren gaineko hainbat jarraibide eman ditu udalak, herritarrek egoki jokatzen jarrai dezaten. Koronabirusagatik gaixo edo koarentenan dauden pertsonen etxeetan hondakinen berariazko ontzi bat izan behar dute pertsona horrek eta bere zaintzaileek erabilitako materiala botatzeko (eskularruak, zapiak,betaurrekoak…). Plastikozko poltsak itxitura hermetikoa izan behar du, eta gelatik atera aurretik itxi behar da. Itxitura hermetikoa duen beste poltsa batean sartu behar da ondoren. Hondakin horiek ezin dira nahastu gaixorik ez dauden gainerako kideek sortutako hondakinekin. Bigarren poltsa hori, errefuxaren edukiontzian utzi daiteke bakarrik, debekatuta dago beste ezein edukiontzitan uztea.
Gainerako egoeretan, Errenteriako Udalak orain arteko bilketa sistema bera mantenduko du, betiere egoeraren bilakaeraren arabera. Oso garrantzitsua da inolako hondakinik ez uztea edukiontzietatik kanpo, edukiontzi irlak ahalik eta egoera sanitario onenean mantentzeko. Salbuespen gisa, errefuxaren edukiontzia zabalik izango da eta ez da txartelik beharko zabaltzeko.
Altzariak eta etxeko hondakin handiak etxean jasotzeko zerbitzua mantenduko du udalak; hura erabiltzeko 943 341 345 telefono zenbakira deitu behar da 08:00etatik 15:00etara. Hondakinak adierazitako ordu eta lekuan utzi beharko dira, eta biltzeaz arduratzen diren pertsonak ez dira inola ere etxebizitzara sartuko.
Garbigune mugikorra ere ordutegi eta leku beretan mantenduko du udalak, nahiz eta San Marko Mankomunitateakk kudeazten duen Oiartzungo garbigunea itxita dagoen. Bertan edukiontzietan utzi ezin diren hondakinak bilduko dira.
Ardura eta erantzunkidetasunerako deia egin du udalak: “egoera honetan kaleak garbi eta inolako hondakinik gabe mantentzea are garrantzitsuagoa da, eta horretarako guztien laguntza beharrezkoa da. Zure esku dago”.
