Kaltetuen izan daitezken kolektiboei begirako egutegi fiskal berria antolatzen ari da udala
Herritarrak, saltokiak eta enpresa txiki eta ertainak laguntzeko neurriak hartzen ari dela dagoeneko jakinarazi du zerga arloan.
Behar handiena izan dezaketeentzat hainbat neurri martxan ditu udalak. Osasun krisiak gehiago kaltetu ditzakeen kolektiboei begira jarri da udala, horiek kontutan hartuta ekonomiarekin lotutako hainbat neurri hartzeko. Herritarrak, saltokiak eta enpresa txiki eta ertainak laguntzeko neurriak hartzen ari dela dagoeneko jakinarazi du zerga arloan.
Honakoak premiazkoak: ordainagiririk ez du igorriko etenda geratu diren zerbitzuengatik, hau da, jaso ez diren zerbitzuen zati proportzionala ez da kobratuko ludoteketan, haurtzaindegietako jantokietan, kiroldegietan, beilarietan, eta azoka txikietan; helbideratutako ordainagirien eta zatipen akordioen zordunketak eten ditu, ez dira beraz, kobratuko hasieran ezarritako epeetan; bilketa exekutiboaren eta enbargoen prozedurak geldiarazi dira, gutxienez, apirilaren 30era arte.
Ordaintzeko borondatezko epean dauden ordainagiri eta likidazioak ordaindu egin beharko badira ere, ordainketa egiteko epea apirilaren 30era arte luzatu ahalko da, adibidez, trakzio mekanikoko ibilgailuen zergaren kasuan. Atzeratu ezin daitezkeen eta hurrengo egun eta asteetan jaulki eta jakinaraziko direnak, ur hornidura edota Etxeko Arreta Zerbitzua, besteak beste, ordaintzeko epea maiatzaren 20ra artekoa izango da, gutxienez.
Egoeraren etengabeko bilakaerak erabaki berriak hartu edota aurrekoak aldatzea badakar, aldaketa horiek ahalik eta azkarren jakinaraziko zaizkiela herritarrei esan du udalak. Edonola ere, egutegi fiskal berria antolatzen ari da, aipatutako kolektiboek datozen hilabeteetan izan dezaketen likidezia faltarekin bat etorriko dena, ahal den neurrian.
Atzerapenak eta zatiketak eskatzeko izapideak erraztu eta arintzeko moduak ere aztertzen ari dela jakinarazi du udalak.
Bestalde, azterketa tekniko sakonagoa eskatzen duten neurriak aztertzen ari da udala jakinarazi duenez, “laguntza sorta bat aztertzen ari gara, autonomoei eta enpresa txiki eta ertainei laguntzeko eta udalerrian garatzen diren 3.000tik gora jarduera ekonomikoei begira, gainerako erakundeek martxan jar ditzaketen laguntzen osagarri”.
