COVID-19 birusaren inguruko atal berria du Lezoko Udalaren webguneak
Koronabirusarekin zerikusia duen informazioa emateaz gain, itxialdia ahalik eta hoberen igarotzeko iradokizunak eskainiko dira atal berrian.
Atal berria, webgunearen azalean bertan dago ikusgai. Irudia: Lezoko Udala. Gustatu ala ez, Covid-19 izurritea, haren hedapena eta horren ondorioz ezarritako konfinamendua biztanleriaren erdigunean daude asteotan. Egoeraren berezitasuna aintzat hartuta, koronabirusaren inguruko atal berezia sortu dute Lezoko Udalaren webgunean. Bertan gaitzarekin eta bere ondorioekin zerikusia duen informazioa emango da baita itxialdia goxatzeko iradokizunak ere.
Atal berria, webgunearen azalean bertan dago ikusgai eta Lau atal izango ditu: Azken berriak, Eusko Jaurlaritzako Osasun sailaren informazio ofiziala, udal oharrak eta etxean zer egin. Lehen hiru atalak gaitzaren informazioa biltzen dute; lehen bietan erkidego mailakoa eta hirugarrenean Lezokoa.
Azken azpiatalean berriz, konfinamenduan bada ere, lezoarren ongizatea hobetzea du helburu. Bertan kirol eta kultur proposamenak jasoko dira. Kirolari dagokionez adibidez, ‘Etxean Entrenatu’ eta ‘Eskola Kirola Etxean’ egitasmoen berri ematen da.
