EH Bilduk alkatetza duen udaletan ERTEak ezartzekotan, soldata osoa jasoko dute langileek
Ahal den neurrian ez dutela kontraturik etengo alkatetzan dauden udaletan adierazi du EH Bilduk, kontratuak ez eteten, alegia.
Azipea Oategi eta Jexux Leonet Errenteria eta OIartzungo alkateak, Mikel Arruti eta Junkal Mintegia Lezo eta Pasaiako zerrendaburu izan zirenekin batera. EH Bilduk alkatetza duen udaletako langileek, soldata osoa jasoko dute ERTEa ezartzekotan. Koronabirusak eragin duen osasun larrialdiaren harira, enpresa ugarik egin dituzte ERTEak, eta udaletara ere iritsi da krisi hori koalizio subiranistak esan duenez, “eragina izaten ari da langile publikoengan ere”.
Ahal den neurrian ez dutela kontraturik etengo alkatetzan dauden udaletan adierazi du EH Bilduk, “dena dela, ERTEak egitera behartuta egon daitezkeen udaletan, Errege Dekretu Legegileak ezarritako 34. artikuluak esandakoa betez egingo da. Hala, langileen soldata osoak ordainduko dira”. ERTEetara bidalitako langileak, gainera, urgentziazko premiak asetzeko sortzen diren lanpostuetara bideratuko dituzte ahal den neurrian.
Alkatetza duten udaletan ERTEa egitea erabakitzen bada, baldintza batzuk bete beharko direla zehaztu du koalizioak: langileekin edota langileen ordezkariekin adostasuna egotea; langileek soldata osoa jasotzea —%70 SEPIk eta %30 udalak— ; eta udalak aurrezten duen dirua krisiaren ondorioei bideratutako iniziatibetara zuzentzea.
Eñaut Garcia EH Bilduko zinegotziak azaldu duenez, ahal den neurrian kontratuen eteterik ez egitea dute helburu eta horretarako lanean ari direla zehaztu du. Adibide gisa jarri du etxez etxeko laguntza zerbitzua. Azpikontratatutakoa da eta 58 emakume ari dira horretan, “enplegu prekario eta feminizatua da. Izugarri jaitsi da eskaera, %70, eta horrek esan nahi du lantegiak 40 langile soberan zituela. Zoratu egin gara, lan moduak aldatu eta funtzioak berkolokatzeko, eta azkenean, lortu dugu jarraitasuna ematea langile guztiei”.
Plan garantista bat izanik ere ERTEak ezartzekotan, indar guztiak kontraturik ez etenbehar izateko jartzen ari direla esan du, “beste urrats bat egin nahi dugu kontraturik eten gabe, eta gure kasuan, ziurrenik, lortu egingo dugu ditugun hamarnaka kontratuak salbatzea, bat edo bi kenduta, gehienez”.
Azken asteotan, behin eta berriz eskatu dio Eusko Jaurlaritzari eta Nafarroako Gobernuari EH Bilduk oinarrizkoak ez diren jarduera ekonomiko guztiak bertan behera uzteko eta konfinamendua zabaltzeko, langileen bizitzak eta osasuna erdigunean jarrita.
