Herritarrei eskerrak eman eta konfinamendua errespetatzeko eskatu du udaltzaingoak
Ondo egiten ari dira herritarrak, jator eta zentzuz betetzen alarma egoerak ezarritako neurriak, eta eskerrak eman dizkie horregatik udalak, baina bereziki, Udaltzaingoak.
Irudian udaltzaingoaren bulego mugikorraren artxiboko irudi bat. Ondo egiten ari dira herritarrak, jator eta zentzuz betetzen alarma egoerak ezarritako neurriak, eta eskerrak eman dizkie horregatik udalak, baina bereziki, Udaltzaingoak. Ezinbestekoa jo dute herritarren laguntza udala eta udaltzaingoaren lana aurrera eramateko: bai jarreraren bidez, bai emandako informazioaren bidez, bai izaten ari diren ulermen eta pazientziarengatik; azken horiek, datozen egunetarako funtsezkoak izango direla diote.
Begi onez ikusten dituzte bizilagunen harremanak indartzeko abiatutako iniziatibak, baina horren harira, gogora ekarri dute besteekiko errespetua bermatu behar dela: “Kontuan hartu behar da bizilagunen artean badaudela osasun langileak, gaixo daudenak, adinekoak, eta horien deskantsua bermatu behar da”. 21:00etatik aurrera musika edo bestelako soinu batzuk altu jartzea debekatuta dagoela gogorarazi dute.
Alarma egoerak ezarritako neurriak egoki betetzen ari direla oro har, esan du Udaltzaingoak eta hori erakusten duten datuak eman ditu: “Hilaren 19an 52 pertsona identifikatu eta 12 salatu genituen; hilaren 25ean berriz, bederatzi identifikatu eta hiru salaketa jarri genituen”. Herritarren jarrera egokiak, Udaltzaingoak prebentzio neurriak hirukoizteko aukera ematen duela nabarmendu dute, eta hartara, segurtasuna bermatzeko anbulatorioetan, tren eta topo geltokietan, supermerkatuetan, eta premiazkoak diren produktuak saltzen dituzten gainerako saltokietan.
Erosketa egiterakoan bezeroei tiketa ematea eskatu diete, eta bezeroek gordetzea, horiek eskatuko baitituzte irteera justifikatzeko. Bide batez, gogorarazi dute erostera ateratzea, txakurra ateratzea edota zaborra ateratzea ez direla aitzakia kalean behar baino denbora gehiago egiteko.
Amaitzeko enpresen zen norbanakoen elkartasun mezu eta keinu guztiak eskertu ditu Udaltzaingoak, baita borondatez eskaini duten laguntza ere, besteak beste, Norbere Babeserako Ekipoa emanez, edota zerbitzuak eskainiz.
