Pasaia osoa ortzadarrez koloreztatuko dute
Ortzadarrak eskuz sortu eta etxeetako leiho eta balkoietan zintzilikatzera deitu dituzte Pasaiako umeak.
Eskuz egindako ortzadarrek Pasaiako balkoi eta leihoak betetzea nahi dute. Konfinamendua gogorra da populazio osoarentzat, baina bereziki nekagarria eta astuna da haurrentzat. Bada, Eskubidean proiektuaren baitan, itxialdia arinduko duen ekintza proposatuko zaie Pasaiako gazteei. Eskulanak onuragarriak izan daitezke horrelako egoeretan, beraz, Pasaiako umeak ortzadarrak eskuz sortzera deitu dituzte —bakarrik ala senideen laguntzarekin—, etxeko balkoi eta leihoetan zintzilika ditzaten.
Norberaren etxean eginiko ariketa izan arren, helburua kolektiboa da; haurrek beste leihoetan dauden marrazkiak ikusiko dituzte eta jakingo dute ez daudela bakarrik.
Gainera, nahi dutenek sortutako ortzadarraren argazkia Instagramen partekatu ahalko dute #Pasaianortzadarra traola erabiliz. Posta elektronikoz bidaltzeko aukera ere izango da. Eskubidean proiektuaren oinarri nagusia, gazteak erdigunean jarri eta haiei hitza ematea da.
