Etxeko plazan ospatuko ditu Errenteriak 700 urteak
Errenteriak 700 urte beteko ditu hiribildu eratu zenetik apirilaren 5ean, datorren igandean. Ezingo du kalean ospatu, handiki, halabeharrez; Covid-19ak eragindako osasun larrialdiak eta konfinamenduak ez duelako horretarako aukerarik eskainiko, baina ospatu ospatuko dutela esan dute gaur udal ordezkariek, Aizpea Otaegi alkatea buru.
Urteurrenaren harira egindako aurkezpenaren artxibo irudia. Errenteriak 700 urte beteko ditu hiribildu eratu zenetik apirilaren 5ean, datorren igandean. Ezingo du kalean ospatu, handiki, halabeharrez; Covid-19ak eragindako osasun larrialdiak eta konfinamenduak ez duelako horretarako aukerarik eskainiko, baina ospatu ospatuko dutela esan dute gaur udal ordezkariek, Aizpea Otaegi alkatea buru.
Plazak debekatuta dauden honetan, etxea bilakatuko dute ospakizun eremu; ez etxe bakarra, Errenteria-Oreretako guztiak baizik. Izan ere, 700. urteurrena ez da ezustean pasatzen uzteko modukoa, are gutxiago, herriko eragileen proposamenekin programazio anitza osatuta dagoenean. Programazio hori etenda dago, baina konfinamendua errespetatuta, ospatzeko bi proposamen egin dituzte Oategik berak, Iñaki Queralt EH Bilduko zinegotziak, Jose Angel Rodriguez PSE-EEko zinegotziak, Josu Mitxelena EAJko ordezkariak, eta Jon Collar Errenteria Elkarrekineko zinegotziak.
700. urteurrena beteko duen egunean bertan antolatu dute ospakizuna, igandean, eta horren harira 19:00etan konfinamendura egokitutako ikuskizuna emango dute Herri Bizia webgunean. Jon Mayaren zuzendaritzapean, Plaza etxean izenburua duen hainbat herriko artistek osatutako bideoa eskainiko dute. Amaieran, musika bandak prestatutako Zentenarioaren bertsio berezia ere emango dute.
Ikuskizuna, interneterako konexioa duen edozein gailutik ikusi ahalko da.
Aurretik baina, beroketa ariketak egitera deitu dituzte herritarrak urteurrenarekin bat egiteko, eta horretarako, etxeko leiho eta balkoietan zapi edo oihal urdinak jartzeko eskatu diete, etxeko txikienek egindako marrazkiak edo antzeko elementu apaingarriekin atontzea, “Errenteriako bizilagunok osatzen dugun gutasuna ospatu eta indartzeko unea da hau, inoiz baino gehiago”.
Film kolektiboa
Pentsaezina genuen moduan kokatu gaituela herri eta gizarte bezala konfinamenduak esan du, bestalde, Otaegik, “eta horrek mota ezberdineko hausnarketak egitera eraman gaitu. Horiek guztiek garrantzi berezia izan dezakete etorkizuneko Errenteriaren eraikuntzan, eta horregatik, film batean biltzeko saiakera egin nahi dugu; Errenteriako egoerak sortutako autoerretrato filmiko bat sortzeko saiakera, hain zuzen ere”.
Errenteriarrak eta euren gogoetak, bihurtu nahi dituzte film horren arima, eta horri begira, hausnarketak bideo laburretan grabatzeko eskatu die Otaegik herritarrei. Proiektuaren xehetasun guztiak Herri Bizia web orrialdean daude bilduta, eta bideoen bidalketa ere bertatik egin behar dute apirilaren 5era arte. “Jasotako grabazio guztiekin editatu ostean Begiradak leihoetatik. Errenteriarren arnas filmikoa film kolektiboa osatuko dugu” azaldu du alkateak. Amaitzeko, datozen hilabeteetan, ahal den neurrian eragileen proposamenekin osatutako egitarauari eutsiko diotela esan du.
