Landarbaso Trail lasterketa bertan behera utzi dute
Maiatzaren 10ean egitekoak ziren lasterketaren bigarren ekinaldia, baina horren antolaketan dabilen lagun taldeak, ez du uste egoera aldatuta ere, ordurako lasterketa egiteko gutxieneko baldintzak bermatuko direnik.
Pena handiarekin eta arduraz hartutako erabakia da, Landarbaso Trail mendi lasterketa bertan behera utzi dute antolatzaileek. Maiatzaren 10ean egitekoak ziren lasterketaren bigarren ekinaldia, baina horren antolaketan dabilen lagun taldeak, ez du uste egoera aldatuta ere, ordurako lasterketa egiteko gutxieneko baldintzak bermatuko direnik.
Lasterkarien osasunak kezkatuta hartu dute erabakia, baina harago ere jo dute: “Guretzat lasterketa mendiari lotutako festa bat denez, gure erantzukizuna korrikalarien segurtasunaz harago, boluntario eta zaletu guztiekiko da”.
Dagoeneko izena emanda zeuden 203 korrikalariei eskerrak eman dizkiete antolatzaileek, “hainbeste aukeren artean gure lasterketa hautatzeagatik; espero dugu datorren urtean ere hala egitea”. Horiei guztiei dirua itzultzeko prozesua hasi dutela dagoeneko jakinarazi dute, bestalde, “baina denbora bat beharko dugu. Arazoren bat baldin baduzue posta elektronikora idatz dezakezue, eta lagunduko dizuegu”.
Geldialdiak, 2021ean indar handiagoz itzultzeko beteko dituela sinistuta azaldu dira, azkenik, “aurten ospatu ezin izango dugun Landarbaso Trailen II. ekinaldiari inoiz baino gogo handiagoarekin ekingo diogu. Laster inguruko mendietan ikusiko dugu elkar, animo”.
